Shillong, Lber 26: Ki Pulit ka Ri Bhoi District ha ka sngi Balang kila ioh ban kem ia khatar ngut ki nong Bangladesh kiba sah beain ha India ha Byrnihat ba kynthup ruh ia u Kingpin jong ka kynhun khaii briew na shilliang ka khappud Bangladesh bad India.
Kane kala wan hadien ba ki pulit kila pynshong nongrim katkum ka jingtip ba kila ioh pdiang ba u kingpin lem bad ka kynhun kiba donkti ha ka kam khaii briew, uba kyrteng u Sukur Janab Shaikh, ula wan na Mumbai sha Guwahati lem bad ki nong Bangladesh ba sah beain ha India.
Ka kynhun ki pulit ka Ri Bhoi kila pynlong ka jingkhynra hapoh ka Rel No 15945 (LTT-Dibrugarh Station) ha Kamakhya Junction & Guwahati Junction.
Ha kane ka jingkhynra, wat lada ia u Sukur Janab Shaikh ym shym la lap satia hynrei la lap pat ïa ki 11 ngut ki nong Bangladesh (kynthup ïa 2 ngut ki khynnah) ha ka jingtalai kali ha mobile check post kaba don ha Byrnihat OP.
Kine ki briew kiba shah kem kila wan da kawei ka kali Tata Sumo kaba don ia u No. AS – 01- EC – 3528, la iathuh ki pulit.
Kine ki briew la tip kyrteng kum u Kakali Sardar (36 snem), ka Hirina Dili Mulla (30 snem), ka Unjilla Sadar (32 snem), ka Rabia Begum (37 snem), Panna Kamal Hussain (42 snem), ka Poppy Hasu Mollah (26 snem), ka Sonia Shaikh (24 snem), ka Sobha Islam (28 snem), ka Saja Uddin Sk (26 snem) ong ki pulit.
U Superintendent of Police ka Ri Bhoi District u Vivekananda Rathore u la pyntip ba ha ka jingtohkit bad ka jingïarap jong ki Pulit ka Assam, la ïoh ban kem noh ïa u Sukur Janab Shaikh @ Sukur ha kane kajuh ka sngi na Nalbari District.
Na ka met jong kine ki briew kiba sah beain ha India la lap ia ki kot ki sla ba shna thok, kiba kynthup ia ki Aadhaar Card, ki PAN card, bad kiwei kiwei bad kine ki briew ki dang thmu ban leit sha ka thain Dawki bad ban kam sha shilliang pud jong ka ri Bangladesh ha ka por mynmiet ne dang step phyrngap, u la ong.
Halor kane ki pulit kila register case ruh ha Nongpoh Police Station bad ia kine baroh kiba shah la kem, bad ka jingtohkit ka dang iaid shakhmat, la bynrap u SP.
