Ap ka Shillong Medical College ia jingwan jurip ka NMC ban sdang treikam pura noh

Shillong, Risaw 27: Ka Myntri ka tnat ka koit ka khiah ka Kong Ampareen Lyngdoh ka la pyntip ba shen ka National Medical Commission (NMC) kan sa wan sha Meghalaya na ka bynta ban pynlong ia ka jingjurip ba pura ia ka Shillong Medical College.

“Lada baroh ki ïaid beit iaid ryntih katkum ka jingkwah ka NMC, ngi thikna ba ngin don ha ka lynti kaba beit ban pyntreikam noh pura iaka Medical College” la ong ka Kong Ampareen haba ïakren bad ki lad pathai khubor hadien ba ka la pynïaid ïa ka jingïalang jong ka governing council jong ka Shillong Medical College Management Society (SMCMS).

Ka Myntri ka la pyntip ba ka sngewkmen ban ioh jingtip ba kiei kiei ki iaid beit hapoh ka por ba la buh.

Ka Kong Ampareen kala ong ba ka jingeh kaba dang shen kaba ka tnat ka la ïakynduh ka dei ka jingshimti noh ïa ka building na ka Suraksha Diagnostic Centre (SDC) kaba la don lypa.

“Ki la don khyndiat ki jingthut hangta namar ba ki (SDC) ki la leit sha ka Kashari bad donbok ba ngi sngewkmen ba ka Sorkar ka la jop ïa ka mukotduma bad mynta ngi la don ïa ka bor kaba pura ban shimti ïa ka jaka” kala ong da kaba bynrap “Ngi la aiti ïa ka complex sha u kontraktor ha ka 16 tarik Lber bad ngi khmih lynti ba ki administrative blocks kin long kiba kloi bad kiba ïaid beit”.

Ka Myntri ka la pynpaw ïa ki sienjam ba la shim ban pyndep ïa ki kyndon na ka bynta ki nonghikai bad ong, “Dang shen ngi la pynbna ban thung ïa ki professor bad kata ruh ka la ïaid bha, ngi la don katto katne ki nongshim bynta”

“Kumba nga la ong ngi kwah ba ka ‘Ghar Wapasi’ kan jia ha ka kynhun ki doktor, bad ngi kyrpad ïa ki khun kiba dei ki nong Meghalaya ba kin wan biang bad noh synñiang sha kane ka projek kaba kongsan bha jong ka jylla Meghalaya” ka la kyrpad.

Da kaba pynpaw ba shen yn sa pynlong ïa ka Workshop naka bynta baroh ki tnat, ka Myntri ka la ong “Ngi lah ban khot mynta ïa ki nongshim bynta sha kane ka Workshop ki ban long kiba myntoi na ka bynta jong ngi ha ki jingai jingmut jong ki, ha kano kano ki bynta ba don ki jingeh.”

Ka la pyntip ba ki don ki professor kiba la wan shim bynta hadien ba ki la bud ryntih ïa ki kyndon bad la shim wai ïa kawei ka ïing kaba don 12 tylli ki unit ban ai jinghikai pyntbit.

“Kumta, kine ki dei ki jingpynkhreh kiba ngi dang leh bad ngi khmih lynti ba ka NMC kan wan shapoh ka Jylla la kadei ha u bnai Iaiong ne Jymmang. Kumta, da kane ka jingpynkhreh baroh kaba dang ïaid shakhmat, ngi khmih lynti ba ïa ki jinghikai dei ban pynbna noh Jylliew-Naitung” kala ong.

“Ki briew ki lah ban don ki jingkylli kumno kan long ki rukom treikam jong ka jingaplai, kaei kan long ka bai lutksan ba la buh. Ngi la thaw mynta ïa baroh ki komiti kiba donkam bad kin sa ai kaiphod biang sha nga” ka la ong.