Shillong, Risaw 31 : U Myntri Rangbah ka Jylla Conrad K Sangma ha ka sngi Thohdieng, ula pynbna ia ka thup kyrteng jong ki khlur pynbyrngia, ki ban pynshongshit ia u paidbah ha ka tamasa Cherry Blossom 2025, ka ban long ha madan Poli ha ka 14 bad 15 tarik Naiwieng.
Ka tamasa kan sei ia ki khlur pynbyrngia ba pawnam ka pyrthei kynthup ia ka kynhun tem rock na Irelang-The Script, u khlur R&B Jason Derulu, u DJ Diplo uba la jop lai sien ia ka grammy, ka kynhun pop ba pawnam AQUA, bad ka aktres Bollywood Nora Fatehi.
Ka tamasa kan ai burom ba kyrpang ia u nongrwai ba pawnam Zubeen Garg ha ka sngi kaba ar, ka ban rwai da ki kaitor kiba iajan eh bad u, kynthup ia u Zublee, Priyanka, Prabin bad Arupjyoti.
Ki kynhun nongrwai bad nongtem kum ka Meba Ofilia, Dappest and Adl, ka Girish and the Chronicles bad Arius ruh kin kiew rynsan ha kane ka tamasa ban pynbyrngia ia ki paidbah ba ieid jingrwai.
Nalor ka put ka tem, kin don ruh shibun ki jingiakop kynthup ia ka Mr and Ms Cherry Blossom, cosplay, bad Cherry Blossom arm wrestling.
Ia ki ticket lah ban shu thied online bad na ka box office ha Shillong.
Haba kren sha ki lad pathai khubor, u Myntri Rangbah Conrad K Sangma ula ong “Nga sngewkmen ban pynbna ia ka thup kyrteng ki ban kiew rynsan jong ka tamasa Cherry Blosson 2025. Mynta u snem, ka tamasa ka kular ban long ka jinglehkmen kaba heh bha ha ka rwai ka put ka tem, ka kolshor kaba pyni ia ka jingdon bun ki nongshongshnong bad ki tynrai bapher bapher jong ka Jylla”.
Ka tamasa Shillong Cherry Blossom kala nang ioh ia ka jingithuh bad kala jop ia ka Golden Banyan Award halor ka Best Cultural Music & Dance ha ka Week Heritage Award 2025 bad artylli ki Gold Awards ha ka WOW Awards Asia 2025.
U Conrad ula pynpaw ia ka jingkhmih lynti ba palat 50,000 ngut ki nongwankai kin iashimbynta ha kane ka tamasa bad ong “Ngi don ka jingkyrmen ba ngi lah ban tam ia 50,000 ngut ha ka jingwan jong ki nongjngohkai….Nga kren ia ki nongwan jngohkai ba nabar, ki ban sahmiet”.
Haba iadei bad ka jingsngewkhia ia ka jingdheng kali, u Conrad ula ong “Ka jingdheng kali kam dei kaba jia tang mynta, kala don la 50 snem…ngin sa khang ia ki katto katne ki jaka ban iaid kali bad nym shah ia ki kali ba kin iaid ha ki por bala buh”.
