Nongpoh, Naitung 13 : Kawei ka karkhana ha Byrnihat Industrial Estate, kala jan kylla dpei na ka jingluh ding kaba jia hynne ka step sngi Saitjain.
Kane ka karkhana ka dei ka Maithan Alloy Ltd kaba don ha Lower Balian, jong ka Byrnihat Industrial Estate.
Kane ka jingjia kala jia ha ka por 6:10 baje mynstep bad la antad ba ka dei na ka jinglait ka umphniang na u Transformer.
Ki kali pynlip ding na Byrnihat bad Nongpoh, kila leit wut wut sha katei ka karkhana ban iakhun ia ka ding bad da ka jingpoi kloi jong ki, la lah ban pynlip ia ka ding hashuwa ba kan pur sha ka karkhana baroh kawei.
U Bijoy Kumar, uba khmih ia ka karkhana ha katei ka por, ula ong ba ka ding kala pluh ha ka Blast Furnance No 1 bad ka ding kala pur sted bha.
Ula pyntip ba ha kane ka jingjia ym shym la don mano mano ruh ba mynsaw.
