SHILLONG, Jylliew 29: Ki surok bad ki jingkieng kiba la jan kot T.200 klur kila julor ha Jylla na ki jingtwa khyndew bad jingshlei um kiba jia hadien ka jingther u lapbah.
Haba pyntip ia kane, u Symbud Myntri Rangbah ka Jylla Bah Prestone Tynsong uba khmih ia ka tnad PWD(Roads) ula ong “Ngi la khein ba ym duna ia ka T.165 klur ki jingjulor tang ha ki surok bad ki jingkieng ha baroh kawei ka Jylla.
U Bah Prestone ula pyntip ba ka tnad jong u ka la dep phah ia baroh ki jingkhein jingdiah bad ki kot ki sla sha ka tnad Revenue jong ka Jylla.
“Ngi la dep aiti lut ia ki jingkhein jingdiah ia kawei pa kawei sha ka tnad Revenue na ka bynta ka Ri-lum Garo, Ri-lum Khasi bad Ri-lum Jaintia bad Ri-Bhoi District ” ula ong.
Ha kajuh ka por, ka Inter-Ministerial Central Team (IMCT) ka la wan poi hynne ka sngi ba-ar sha Jylla.
Ka IMCT kan sa leit jurip mynta bad lashai ka sngi ia ki jaka ba shah ktah ha ka jingshlei um ka Jylla ban lum jingkhein ia ki jing pynjulor ka mariang. Ka IMCT ka dei ka kynhun ba la phah da ka Sorkar Pdeng.
U Myntri kam pohiing ka Ri u Amit Shah ula pyntip ba ula dep iakren bad u Myntri Rangbah ka Assam Himanta Biswa Sarma bad Myntri Rangbah ka Jylla Conrad Kongkal Sangma bad iasyllok ruh halor ki jinglong jingman ha kine ki artylli ki Jylla na ka jingther u slap bad jingshlei um.
“Ka Sorkar u Modi ka don ryngkat bad ki Nongshong shnong ka Assam bad Meghalaya ha kum kane ka khep” ula ong.
Haduh 35 ngut ki briew kila iap na ka jingshlei um baf jingtwa khyndew ha Ri-lum Khasi bad Ri-lum Garo na ka jingther u lapbah ha ka 16 bad 17 tarik Jylliew.
