Shillong, Nailar 31: Shillong, Nailar 31: Ka Sorkar Meghalaya Democratic Alliance (MDA) hynne ka sngi kala rai ban pynkynriah ia ki 342 tylli ki Longiing jong ki Harijan na Them Metor, Them Iewmawlong sha ki Quarter jong ka Shillong Municipal Board kum ka lynti ban pynkut noh ia kane ka kam bala sahteng lah slem bha.
Ia kane la pyntip da u Symbud Myntri Rangbah ka Jylla Bah Prestone Tynsong hadien ka jingialang bad ka Tnad Urban Affairs ka Jylla bala iadonlang u Myntri ma Sniawbhalang Dhar.
“Hadien ba bishar ia baroh ki kam ki jam, ngi la rai ban pynkynriah ia ki 342 tylli ki Longiing na Them Metor sha ki Quarter ka SMB ba don pyrshah ka Quarter u Nongialam ka Liang Pyrshah” ong u Bah Prestone.
Kine ki Quarter ki dei kiba la pynkylla mynshuwa kum ka Ophis treikam ba shipor jong ka SMB kaba don ha Bishop Cotton Road, Shillong.
U Symbud Myntri Rangbah ula pynbna ruh ia ka rai jong ka Sorkar ban shna ia ki Housing Flat ha kane ka jaka kaba heh 2.5 acre.
“Mynta ngin sa pynpra noh ia kine ki Quarter ba rim bad ngin sa tei thymmai da ka flat system ba 5 lane 7 mala kat kum ka Meghalaya Development Urban Authority (MUDA) byelaws,” ula ong.
Ula bynrap ba la dep bthah ruh ia ka Tnad Urban Affairr ba kan pynkhreh ia ka Detailed Project Report (DPR) ban tei ia kine ki Flat tang hapoh ka shibnai shiteng.
Kat kum ka jingong jong u, ka jingtyrwa ka long ban tei haduh 12 tylli ki Block ban pynsah ia ki 342 tylli I Longiing.
U Bah Prestone u pyntip ba un sa pyntip noh ia kane ka rai jong ka Sorkar sha ka Harijan Panchayat Committee ha ka jingialang ka ban sa long hadien ba kut jong une u bnai.
Haba kylli, u Bah Prestone ula ong ba ka Sorkar kan ithuh beit thik tang ia ki 342 tylli ki Longiing kiba la ai jingkhein da ka Iingkashari Meghalaya High Court ym palat ia kane ka thup.
