Pan por ka HPC shibnai ban iamir jingmut bad ki Longiing
Shillong, Jymmang 07 : Ka Sorkar Jylla kala rai ban shong biang sa kawei ka jingialang bad ka Harijan Panchayat Committee (HPC) ha ka 7 tarik Jylliew, ban shim ia ka rai ba khatduh halor ka jingpynkynriah ia ki 342 tylli ki Longiing na Them Metor, Them Mawlong haba iengskhem ruh ha ka nongrim ba kan nym ai jaka satia ia ki “briew ba shong be-ain”.
Kane ka rai kala mih na ka jingialang hapdeng ka Sorkar Jylla bad ka Harijan Panchayat Committee kaba long hynne ka sngi Ba-ar ha Secretariat, kaba la pyniaid da u Symbud Myntri Rangbah ka Jylla ba khmih ia ka Tnad Pohiing Bah Prestone Tynsong.
Haba iakren bad ki nongthoh khubor, u Bah Prestone ula ong “Haba khatduh, mynta ka sngi ngi la iakren ia ki katto katne ki mat ba kongsan haba iadei bad ka jingpynkynriah ia ki Longiing. Namar phi sngewthuh shisien ba ngi la rai ban pynkynriah ka mut ka dei kaba shirta…kumta ngi la iakren (ia katto katne ki mat) bad ki (HPC) la pyni ba ki long kiba kloi”.
Hynrei ula pyntip pat ba ka HPC kala kyrpad ia ka Sorkar Jylla ba kan shah ia ki ba kin leit iakren ia kaei kaba mih na kane ka jingialang bad ki briew kiba sah ha Them Metor hashuwa ba kin wan biang sha ka jingialang kaba khatduh halor kane ka kam.
“Ka HPC kala kyrpad ia ngi ban aipor sa shibnai ia ki ba kin leit bad iashong bad iakren bad ki Longiing bad ha ka 7 tarik Jylliew, ngin sa iakynduh biang bad ngin sa shim ia ka rai kaba khatduh” ong u Bah Prestone.
U Symbud Myntri Rangbah ula pyntip ruh ba u Director ka Tnad Urban Affairs bad Chief Executive Officer (CEO) ka Shillong Municipal Board (SMB) kila shong bishar bad pynthikna mynta ia ka jubab RTI jong ka SMB bala ai sha ka HYC ba ong ba ki don tang 194 ngut ki Nongtrei Sorkar napdeng ki 342 tylli ki Longiing kiba don ha Them Metor.
Kane kala mih hadien ka jingdawa jong ka HYC ban shu kyndang ia ki 148 tylli ki iing kiba shong beain ha Them Metor, Them Iew Mawlong kat kum ka jingshem na ka RT.
Kat kum ka jingong jong u, ka Sorkar ka dang ap iaka Tnad Urban Affairs bad ka SMB ba kin pyndep ia ka jingbishar ha kaban pynthikna ia kane ka RTI.
Nalor kane, u Bah Prestone ula pyntip ba kala don ka jingpluh ding kaba shyrkhei ha Them Iew Mawlong ha u snem 1996 ha kaba bun ki Iing kila iing bad julor bad ha kane ka jingjia, katto katne ki kot ki sla kila jah.
“Namar kane ka jingjia, u Director ka Tnad Urban Affairs ha u snem 2008 bad 2009 ula ai jingbthah ia ka MUDA ban pynlong biang ia ka survey ba thymmai ha ka jingiadonlang kito ki longiing ha Them Metor, ia kaba kila dep leh. Kumba nga ong, haba pynshong nongrim ia ka RTI ba jubab da u CEO ka SMB, ngam pat lah ban ong eiei ia mynta namar ka MUDA bad Director ka Urban Affairs ki dang shong bishar ban pynthikna ia ka RTI”.
Haba kylli, u Symbud Myntri Rangbah ula ong ba ka Sorkar Jylla kam lah ban kynthup lang ha kaban ai jaka sah ia ki briew ba shu shong beain haba pynbeit ia kane ka kam kaba la sahteng la slem bha.
“Naduh ka sngi ba nyngkong ngi la ieng skhem ha ka nongrim ba ngim don jingpatiaw satia ia kiba shong beain, ngi shimkhia tang ia kiba la ithuh. Ta ka daw nga la bthah ia ka Tnad ba dei khmih ban pynthikna ia ka jubab RTI. Lada don kiba shu shong beain bad kito ki bym shym la noh synniang sha ka Jylla, ngin ym lah ban kdup lang ia ki” ula ong.
Ha kajuh ka por, u Symbud Myntri Rangbah ula ong ba ka Sorkar kala ieng skhem ha ka rai ban pynkynriah ia ki 342 tylli ki Longiing na Them Metor, Them Iew Mawlong.
 ha ka 7 tarik Jylliew, ban shim ia ka rai ba khatduh halor ka jingpynkynriah ia ki 342 tylli ki Longiing na Them Metor, Them Mawlong haba iengskhem ruh ha ka nongrim ba kan nym ai jaka satia ia ki “briew ba shong be-ain”.){kind=link}