Shillong, Iaiong 18: U Symbud Myntri Rangbah ka Jylla ba khmih ia ka tnad PWD (Roads & Buildings) Bah Prestone Tynsong ha ka sngi Saitjain, ula plie ia ki projek kiba la kynjoh palat T.100 Klur ha ka shnong Wahiajer kaba pyni ki kam pynroi kiba la leh da ka sorkar MDA bad khot sha ka jingiakren ban weng ia ka jingiapher jingmut.
Ki projek kiba la plie ki kynthup ia ka jingtei bad jingshna pynbha ia ka U.N Road, Pdein Mukhim, Sohphoh Mookabeng & Kdohkule (21.255 km) kaba la mang T.100 Klur hapoh jongka State Road Fund, ka jingtei ia ka jaka jong ka National Games hajan jongka Multi Sports Complex, Wahiajer kaba kot T.89.20 lak, ki kam pynroi ha ka shnong Wahiajer kaba T.2 Klur bad ia ka Wahiajer Water Supply Scheme hapoh jongka JJM.
U Bah Tynsong ula buh ruh ia u mawnongrim ban buh ia ki Lighting System kaba 1400 Lux ha ka Athletic Track bad ka madan ialehkai Football ha ka Multi Sports Complex, Wahiajer kaba T.8.94 Klur bad ban tei bad pynbha ia ki surok hapoh jongka Central Roads Infrastructure Fund (CRIF) jong u snem 2025-26 hapoh jong ka Jowai Central Division bad Jowai South Division ha ka jinglut kaba kot T.20.92 Klur.
Haba kren ha ka jingialang, u Bah Tynsong ula iaroh ia u Symbud Myntri Rangbah u Bah Sniawbhalang Dhar u MLA ka Narliang, da kaba ong, “Udei u briew uba trei shitom bha ban shakri ia ki briew hapoh ka constituency, ka thain bad ia ka jylla baroh kawei”.
Ha kaba iadei bad ka jingiaid lynti jong ka sorkar, ula ong, “Hapoh ka jingialam u Myntri Rangbah u Conrad K Sangma, ngi lah shakri ia ka jylla la 8 snem. Naduh u snem 2018, Nga lah ban ong ha phi bad ngi lah iohi ia ki jingkylla ha kylleng jong ka jylla Meghalaya.”
Haba pynkynmaw halor ka jingwan saphriang ka khlam COVID-19, ula bynrap, “Ngam lah ban klet ia u snem 2018 haduh 2023. Kila don ki por, ba ki ummat kila jaw na ki khmat ki jong ngi. Ngi lah iaid lyngba ki miet kaba ngim iohthiah ha ka por ba saphriang ka khlam COVID, hynrei da ka jingkyrkhu u Blei, ngi ia don lang hangne mynta”.
Haba kdew ia ki jingtei kiba la dep, u Bah Tynsong ula ong, “Ha ka samoi kaba la dep, ngi la lah ban pyndep ia projek kiba kongsan ha Shillong. Kawei kadei ka Crowborough Hotel, kaba la long ka jingpeit matsuh la bun phew snem. Lyngba kane ka jingpyndep, haba leit shatei mynta ka sngew kumba don ha Delhi. Ka baar kadei ka Marriott Hotel. La pynlong bun tylli ki jingialang bad ki VVIP kiba na Delhi ia kaba la pynlong ha kitei ki artylli ki Five-Star Hotel. Kadei ka mat jong ka jingsngewsarong bad ka jingkyrkhu kaba khraw ia ka jylla”.
Ula pynpaw ruh halor ka jingshah kthah na ka jingbym iohkam, da kaba ong, “Kiba bun na ki samla jong ngi, kiba la pyndep ia ki jingpule ki jongki bad ia ki jingioh jinghikai ha ka ‘Hospitality’ kila wanphai ban ai jingshakri lyngba kitei ki ar tylli ki Hotel.”
Ha kaba iadei bad ki kam ban pyniar ha ki snem ban wan, ula pynbna ba ka sorkar jylla kala tyrwa ban tei shuh shuh ia ki Hotel.
“Bun tylli ki MoU la dep ban iasoi bad nga ngeit ba ha kine ki snem kiban wan, sa 3 ne 4 tylli ki Five-Star Hotel kin sa mih ha Shillong bad ha kiwei kiwei ki bynta jong ka jylla” ula ong bad ka bynrap, “Shisien ba la pyndep ia kine ki projek, da ki hajar ngut ki samla kiba trei ha kylleng ki bynta jong ka ri kin wanphai noh ban shakri ha la ka jong ka jylla”.
Haba kren halor ka jingpyrshah ia ki projek, u Bah Tynsong ula banjur ba kadei ban don ia ka jingdonbynta lang.
“Haba phi pyrshah ia kaei kaei, kan bha shibun ban iashong iakren ha ka miej, iatai bad ban pynbeit ia ka mat. Ym don mano mano ruh kiba biang lut. Ngi dei tang ki briew. Phim lah ban ong ba u Bah Prestone bad Sniawbhalang kidei kiba biang lut, ngim dei kiba biang lut. Hynrei kaba kongsan ka long ban pynbeit ia ka mat” ula ong.
Ha kaba iadei bad ka jingshah kynthoh halor ka shongsuk shongsain, ula ong “Ki don kito kiba ong, ba ka Sorkar MDA-I bad MDA-II ki long kiba tlot bha ban khmih ha kaba iadei bad ka shongsuk shongsain. Hynrei nga kwah ban ong ia phi ba u Myntri Rangbah, Sniawbhalang bad nga, ngi ngeit ba kum ki nongialam ngi dei ban long kiba jai jai. Ngin plie ia ki jingkhang jong ngi na ka bynta ban iakren bad ngi kwah ba ki briew jong ka jylla kin sngewthuh ia kaei kaei kaba ngi leh baroh”.
Haba iaroh ia ka rilum Jaintia, ula pynpaw, “Kaei kaba sngewtynnad ia ki paitbah ka rilum Jaintia kadei ba kim ju ialeh ban wad daw da ka jingthmu ban pynjot ia uno uno u briew. Wat haba ki wad daw ruh ki leh pat ha ka lynti kaba biang. Dei na kata ka daw ba ka don bha ka kam pynroi ha ka thaiñ”.
Ha kane ka jingialang la iadonlang u Symbud Myntri Rangbah u Bah Sniawbhalang Dhar, u Myntri ka koit ka khiah u Bah Wailadmiki Shylla, u Myntri Sorkar barim u Bah Comingone Ymbon, u MLA ka UDP na Mawsynram u Bah Olan Sing Suin, ka MDC na Nongpoh ka Kong Rona Khymdeit, u Commissioner & Secretary u Dr Vijay Kumar bad kiwei kiwei ki heh ki haiñ.
 Bah Prestone Tynsong ha ka sngi Saitjain, ula plie ia ki projek kiba la kynjoh palat T.100 Klur ha ka shnong Wahiajer kaba pyni ki kam pynroi kiba la leh da ka sorkar MDA bad khot sha ka jingiakren ban weng ia ka jingiapher jingmut){kind=link}