Shillong, Iaiong 18: U Symbud Myntri Rangbah ka Jylla bad MLA ka Nartiang Bah Sniawbhalang Dhar ha ka sngi Saitjain, ula ong ba ka sorkar MDA hapoh ka jingialam u Myntri Rangbah u Conrad K Sangma kala pynthikna ba kan don ka roi ka par ha baroh ki 60 tylli ki Constituency kynthup ia kito kiba la mihkhmat da ki MLA na ka Liang Pyrshah.
“Hapoh ka jingialam u Myntri Rangbah, ka sorkar MDA kala pyniar ia ka roi ka par ha baroh 60 tylli ki constituency. Kadei tang kane ka sorkar kaba ialam da ka NPP, kaba la pyniar ia ki kam pynroi wat ha ki constituency kiba la mihkhmat da ki MLA na ka Liang Pyrshah” ong u Bah Dhar ha ka jingplie ia ka projek kaba T.100 Klur ha ka shnong Wahiajer, West Jaintia Hills District.
“Kam don wat tang kawei ka constituency kaba la shah ieh shadien. Ka sorkar kala wanrah bun bha ki kam pynroi ha ka New Shillong bad ha ki constituency bapher bapher. Kata kadei ka sorkar MDA kaba la ialam da ka NPP” ula bynrap.
U Bah Dhar ula iaroh ia u Symbud Myntri Rangbah u Bah Prestone Tynsong halor ka jingpyniaid shakhmat ia ki jingtei ki bapher.
“Ngi dap da ka jingsngewsarong ban don ia u Symbud Myntri Rangbah u Bah Prestone Tynsong uba khmih ia ka PWD ha kine ki 8 snem kiba la dep. Nga sngewsarong ia kata, ha kaba iadei bad ki kam pynroi ia ki jingtei, ka Meghalaya kala kam shakhmat bha”.
Ula pynpaw ba jingthmu ban shna ia ka surok na Lad Umroi-Silchar kadei kawei na ki projek kaba kongsan bha.
“Kawei na ki projek kaba heh ha ka ri kaba palat ia ka T.21,800 Klur ka jingshna ia ka surok na Lad Umroi shaduh Silchar, shen kan sa don noh ia ka jingbuh ia u mawnongrim da u Myntri Rangbahduh ka ri. Kane kan dei ka surok Four Lane Greenfield Project kaban iaid lyngba katei ka jaka”.
Ha kaba iadei bad ka jingbhah kaba ia ryngkat, ula ong, “Nga kwah ban pynpaw ia ka jingkmen halor ki kam pynroi ha ka constituency ka jong nga. Ngi don ia u
Symbud Myntri Rangbah uba khmih ia ka PWD u bym shah liang bad peit ia baroh 60 tylli ki constituency. Ha West Khasi Hills, kila mih ki surok kiba thymmai. Ha jan man la ki tnad sorkar la kadei ka koit ka khiah, kam jngohkai ne ka umbam, ki kam pynroi kidei kiba la pyniar sha baroh ki constituency. Ngi lah sam ia bhah tyngka ha kata ka rukom ba kan ym don kano kano ka tnad kaban shah niew beiñ”.
U Bah Dhar ula pynshai halor ka jingkyntiew ia ka bhah tyngka ha ka kam jngohkai.
“Mynshwa, ka tnad jngohkai ka ju ioh ia ka mang tyngka kaba T.20 Klur hynrei naduh ba ka sorkar MDA kala wan ha ka bor, kaba duna eh kadei da ki hajar klur kiba la bhah na ka bynta kane ka tnad man la ka snem”.
Ula kdew ruh halor ka jingkiew ka jylla ha ka jingpynlut.
“U Myntri Rangbah ula pynpaw ha man la ka jingai jingkren ha kaba iadei bad ka Mang Tyngka ba ha u snem 2018, ka Mang Tyngka jong ka jylla ka long tang T.9,000 Klur bad hapoh jong ka 8 snem kala kiew sha ka T.32,000 Klur. Balei? Namar ba kane ka sorkar ka treikam. Ngi ngim don ia ka por ban pynleit jingmut ia kito kiba kynthoh ia ka sorkar, namar ngi bunkam ban shakri ia ki paitbah bad ia ka jylla”.
“Lada ka sorkar kam trei ia ka kam, ki paitbah kin ym iohlad ban kynthoh eiei ia ngi. Ki briew ki kawang maw tang ia u dieng uba mih ki soh” ula ong.
Ha kaba iadei bad ki projek kiban dang wan, u Bah Dhar ula ong, “Ngi ngin wanrah ia ki projek kam pynroi kiban kot da ki klur tyngka ha ka jylla baroh kawei. Ka jylla kan pynlong ia ka National Games. Napdeng ki 27–28 tylli ki jylla ha ri India, ka Meghalaya hapoh ka jingialam u Myntri Rangbah, kala lah ban ioh ia ka kyrdan ban pynlong watla kala don ka jingiakhun na ki jylla kiba heh”.
Ha kaba iadei bad ki jingkynthoh halor ki Concert ne ki tamasa ka tem ka put kaba wan ban tem da ki kynhun nabar ri, ula ong, “Namar kine ki nongtem, ia ka Meghalaya la tip lut da ka pyrthei baroh kawei. Ki briew kila kylli “Shaei ka don ka Shillong kaba kine ki nongtem ki leit ban tem?’ Ka don ka por ia kiei kiei baroh ha ka jingim”.
“Ki don ki politishan kiba don ia ka por ban pynlut bad ki paitbah ha ki shnong bapher bapher hynrei kim ai pat ia kino kino ki kam pynrpoi. Mynta kito kiba trei malu mala ki don ia ka por ban shong. Kum ki politishan, bun ka por kaba ngim ju ioh ban leit jngoh ia la ka constituency namar ba ngi bunkam hapoh Secretariat, ban wanrah ia ki kam pynroi ia ka jylla. Kumta ka long kaba bha ban iaroh ia ka sorkar bad ia ki kam kiba bha ki jongka. Lada phi iaroh, ngi kum ki politishan ngi ioh mynsiem ban trei shitom shuh shuh” la bynrap u Bah Dhar.
