Shillong, Jymmang 16: U Neblejohn Lyngkhoi ula ioh thep ia ka Hat-trick kaba nyngkong eh ha ka 5th Meghalaya State League, ha ka jingiakhun iaka Quarterfinal ha kaba ka Nangkiew Irat SC kala pynrem da 7-1 ia ka Maram FC ha ka jingiakhun ha ka Group B kaba la long hynne ka sngi Saitjain ha SSA Stadium.
Ha kawei pat ka jingiakhun, ka Langsning FC kala bteng ban jop lynter baroh 9 sien ha ki jingiakhun bad mynta ka sngi kala pynrem ia ka Rymbai Shkenshynriah SC da 3-0. U Donlad Diengdoh ula thep kol ha ka 14 minit, u Kyrmenskhem Mukhim ula thep kol ha ka 40 minit katba u Nelson Rymbai ula thep ia ka kol ha ka 59 minit jong ka kylla miet.
U Dibinroy Nongspung ula thep kol ha ka 15 minit na ka bynta ka Nangkiew Irat hynrei ka Maram FC kala ioh ban pyniakhaid ha ka minit kaba 21 haba u Seiborlang Tado ula ioh thep ia ka kol.
Ka Nangkiew Irat kala pynshong noh ia u Banshanlang Dhar uba la mynsaw bad la pynmih bujli noh da u Sandy Kharkongor uba la thep ia ka kol ha ka 27 minit.
U Neblejohn ula ioh thep ia ka kol kaba nyngkong ha ka minit kaba 39, ia ka kol ka baar ula thep ha ka 57 minit bad ia ka kol kaba lai kaba dei syndon ka Hat-trick ha ka minit kaba 66 lyngba ka jingleit shut ia ka Penalty ia kaba ym shim la pynlehnoh ei.
Ka Nangkiew Irat kala iai bteng ban thep kol lyngba u Ronaldkydon L Nonglait ha ka 83 minit bad u Neblejohn ula ioh thep biang ia ka kol ha ka minit kaba 87.
Kane kadei ka jingjop kaba nyngkong ia ka Nangkiew hadien ba kala shah pynrem ha ka Shkenshynriah ha ka jingiakhun kaba nyngkong, katba ka Maram FC kala bteng ban rem ha baroh arsien ha ka Langsning da 7-0 bad mynta da 7-1 ha ka Nangkiew.
Ka Langsning kala ioh khur 6 point, ka Rymbai Shkenshynriah bad ka Nangkiew Irat kila ioh mar 3 point.
Ha ka sngi Nyngkong ha ka Group A, ka Rangdajied United FC kan iakhun pyrshah ia ka Mawlai SC ha ka por 2 baje mynsngi bad kine baroh ar tylli ki kynhun ki donkam ban khur ia ka jingjop.
Hadien kane, ka jingiakhun kan long hapdeng ka lahduh jong ka Group ka Shillong Lajong FC pyrshah ia ka Nongkseh SSCC kaba wan baar ha ka por 6 baje janmiet.
