Shillong, Jymmang 16: Ka Ramakrishna Mission Vivekananda Cultural Centre, Shillong hynne ka sngi Saitjain kala pynkup burom ia ki 823 ngut ki samla jong ka Batch ba 114 ba pule Computer bad 52 ngut ki samla kiba pule ha ka sobjek Language.
Ka RKM kala ai jinghikai ia kumba 6,000 ngut ki samla man la u snem ha ki jinghikai bapher bapher kynthup ha ka sobjek Computer bad ka Centre kala ai jingithuh ruh ia 1,129 ngut ki nongshah hikai na ki jylla bapher bapher jong ka thaiñ Shatei Lam Mihngi.”
Ia ki samla la shah pynkup burom da ki Momento bad kiwei ki khusnam.
Kiba la ioh khusnam ki kynthup ia ka Sonidaphitori Myrthong na ka bynta ka Computer-Beginner, u Gautam Bahadur na ka bynta ka Intermediate, ka Madonna Nongsiej na ka bynta ka Tally-I, ka Philasara Nongkhlaw na ka bynta ka Tally-II, ka Ameda Giovana Kyndiah na ka bynta ka DTP & Webdesigning, ka Josephine Rapsang na ka bynta ka Database, u Guutam Bahadur na ka bynta ka P Adv. Excel ryngkat ka Power BI bad u Dawanlumlang Khyriem na ka bynta ka Language and Communication Skill (Beginner).
Nalor kata, la sam ruh ïa ki khusnam haka Sobjek computer ïa ka Dibanshai Kharlynnai bad Reshina Hajong.
U Swami Vedeshananda, u Director jong ka RKM u la ai khublei ïa ki samla pule bad u la ai mynsiem ïa ki da kaba pynskhem ïa ki jingjop jong ki”.
Ula pynpaw ba “ka kot khubor Khasi kaba la pynmih kyrpang ia kaei kaba u Swamiji ula kren ha kata ka jingleit jngoh kaba pawnam jong ka snem 1901, da kaba kyntu ia ki samla ban sei ia ka bor pyrkhat bad ka jingshaniah ha lade na kane ka pateng ba riewspah jong ka thain.”
U Prof. Binayak Dutta, u Associate Professor, Department of History, NEHU ula kynthoh ba ha ka khyllipmat ba kine ki jingmut jingpyrkhat kiba dang samla ki rung sha kane ka jaka, ki la iaid lypa ha kajuh ka lynti kaba u Swami Vivekananda ula iaid.
Ula kdew ba katba ki smartphone ki plie lad ïa ki samla ban ioh ia ka jingtuid jong ka jingtip kaba mut ba ki jingeh jongki ha ka juk mynta ki kham khia, hynrei ki jingangnud jongki kila kham heh katkum kata.”
