Shillong, Jymmang 16: Ka iingkashari ha ka sngi Thohdieng kala ai jamin ne Bail ia u MLA barim ka Phulbari u Esmatur Mominin ha kaba iadei bad ka jingiakynad kaba la jia ha rilum Garo, ha kaba ula shah kynnoh ba ula pynsaphriang ia ka jingiashun hapdeng ki jaidbynriew.
Sessions Judge, Tura AM Ripnar la ai jamin kaba hap ban siew T.80000 ia u SG Esmatur Mominin ryngkat bad ar tylli ki ‘Surety’, la iathuh ki tyllong khubor.
Ka iingkashari kala bthah ba ia ka ‘Bail Bond’ dei ban pyntreikam hapoh jong ka JMFC, Phulbari Circuit Court bad ka bynrap ba ka jingkyrpad ia ka jamin la pynkut noh.
Kila don ar tylli ki ejahar kiba la ujor pyrshah ia u Mominin da u Nongialam ka Liang Pyrshah u Dr Mukul Sangma bad u MLA barim ka South Tura u John Leslee Sangma.
Haba ai ia ka jamin, ka iingkashari kala buh pat ia ki kyndon kiba tyngeh ia une u nongshah kynnoh. Udei ban leit mih hakhmat jong u Investigating Officer haba donkam bad ruh hakhmat jong ka iingkashari wat ha ki por ba la ai iaka Chargesheet.
Ka hukum kala kdew ruh ba ym dei ban phet rieh, ban pynduh pyndam ia ki sabut, ne ban pynbiej, byrngem byrsit ne ban leit iakynduh ia ki nongujor ne ia ki sakhi.
U Mominin ula shah mana tyngeh ba ym dei ban mih palat ia u pud u sam jong ka iingkashari khlem da ioh jingbit shwa bad la bthah ba ym dei shuh ban leh biang ia katei kajuh ka kam sniew ha ki por ban wan.
Ka iingkashari kala byrngem ba ka jingpulom ka jongu ban bud ryntih ia kitei ki kyndon jingbthah bad ia ki kyndon jong ka jingioh jamin ka lah ban shah pynduh noh.
Lah ban kdew ba ha ka 13 tarik u Iaiong 2026, u Mominin ula leit ban pyndem ialade hakhmat jong ki pulit ka Nongpoh, Ri Bhoi, hadien ba ula phet rieh ha kaba iadei bad ka jingiakynad bad ka jingbym don ka shongsuk shongsain hapoh ka rilum Garo. Ula phet rieh naduh ka por ba kala mih ka jingiakynad bad ka jinghuri hura hashwa ban long ka elekshon jong ka Garo Hills Autonomous District Council (GHADC) ha u bnai Lber.
Kane ka jingkynthoh kala mih, ha ka 9 tarik u Lber ha kaba u Mominin ula leit poi ha ka ophis jong u Deputy Commissioner ha Tura ban thep kyrteng ban iakhun ia ka elekshon GHADC.
Kane ka jingdon ka jongu kala pynmih ia ka jingbitar bad ka jingiakynad hapoh ka phllaw ophis jong u DC bad nangne kala mih syndon ka huri hura bad ktah ia ka shongsuk shongsain.
Hadien ha kane kajuh hi ka sngi, la kynnoh ba ula ai jingkren ban pynshit ha ka jingialang ha Chibinang bad kane kala nang pynheh shuh shuh ia ka jingkynad bad lam ruh sha ka jinghuri hura ha kylleng ki bynta jong ka rilum Garo.
Hadien kine ki jingjia, ka jinglong jingman kala nang sniew, kaba la pynlong ia ki bor kiba dei khmih ban pynsangeh noh ia ka elekshon jong ka GHADC namar ka jingbym don ka shongsuk shongsain.
