Shillong, Lber 22: Ki paidbah napoh ka shnong Chibinang West Garo Hills hynne ka sngi kila ioh ban pyllait ia u bsein Python ba heh haduh 5 ft na ka ingsah jong u MDC ka GHADC u Habibuz Zaman.
Ia une u bsein Indian Python bala jan duh jait, la ioh ban pyllait ha ryngkat ka jingdon lang ki nongtrei ka tnat Forest jong ka GHADC.
Naka liang u DFO ka tnat Forest u Rupankar Marak ula iathuh ba ia une u bsein bala jan duh jait iaka ba la tip kum u Indian Python, la ioh pyllait na jaka buh dieng thang ba don ha ka ing u MDC ka GHADC.
U Rupankar ula iathuh ba une u bsein um dei ba la ri ha ing bad ula iathuh ba ia une u jait bsein la pynbna kum u jait bsein bala jan duh jait bad la mana ban pyniap ne pynmynsaw katkum ka Schedule I jong ka ain Wildlife Protection Act, 1972.
