Guwahati, Lber 17: Ki pulit ka Assam ki la ioh ban kurup shibun bah ki tiar siat bad ki kuli na ki bynta jong ka Doidak kaba hap hapoh Dokmoka police station ha Karbi Anglong district ka Assam ha ka sngi Balang ba la lah ia kiba la buhrieh hapoh khyndew.
Katkum ki tyllong khubor pulit la ong ba kane ka jingioh kurup ka kynthup ia kawei ka suloi AK-56 Rifle, kawei ka pistol 9 mm kawei ka pistol one 0.32, kawei ka one 9 mm Sten gun ha ryngkat artylli ki magazine, 9 tylli ki magazine AK, 88 tylli ki kuli AK ki bym pat pyndonkam bad 7 tylli ki kuli 9mm.
“Hadien ba la ioh ia ka jingtip kaba bniah na ka liang ki bor pulit ki la ioh ban kurup noh ia kine ki tiar siat bad shibun bah ki kuli ia kiba la tep hapoh khyndew ha ki bynta jong ka Doidak kaba hap hapoh Dokmoka police station.Mynta ngi dang pynlong ia ka jingtohkit kaba bniah ha kaba iadei bad kane ka bynta, kata ban lap ia kiba donkti ha kaba buhrieh ia kine ki tiar siat bad ban lap ruh ia ka jingthmu kaba shalyndet lane ioh dei ka jingdonkti jong ki kynhun kieng atiar,” ong u SP ka Karbi Anglong u Sanjib Kumar Saikia.
