Shillong, Lber 17 : U Myntri bad Nongaiktien ka Sorkar Meghalaya Democratic Alliance-2 (MDA-2) Bah Paul Lyngdoh hynne ka sngi thohdieng, ula ong ba ka kylla kaba ar jong ka jingiakren pynbeit pud na ka bynta ki hynriew tylli ki jaka ba dang sah, kan sa sdang noh hadien ka Dorbar Mang tyngka ban wan jong ka Jylla.
“Tang mar syn kut ka Dorbar Mang tyngka, ngin sa sdang biang ia ka jingiakren pynbeit pud” ong u Bah Paul haba iakren bad ki nongthoh khubor.
Halor ka jingkam ba dang shen jong u Myntri Rangbah ka Assam Himanta Biswa Sarma ba ka Mukroh ka dang hap sha Assam, u Bah Paul ula ong “Kumba nga ong, ngi la rai ban iakren bad hynriew tylli ki jaka ki dei ki bym pat iapynbeit. Mano mano ruh ki lah ban ong kat kaba ki sngewbit hynrei ka Sorkar hi ka ieng ha ka nongrim ban pynshisha ia ki jingiakam trai ia ki jaka da ki kot ki sla…Ngi lah ban kam ia kano kano ruh, ka dei kaba suk palat hynrei to ngin pynkhlain ia ki jingkam lyngba ki kot ki sla”.
Haba kylli la kum kine ki jingiakam markylliang kan ym ktah ia ka jingiakren pynbeit pud ba dang iaid, u Bah Paul ula ong “Ki jingiakam markylliang ki mih namar ka jingbym iapynbeit ia u pud u sam hynrei shisien bala dep ban iapynbeit, ka jingkylli ban iakam trai kan nym mih shuh”.
“Nalor kata, ka Meghalaya ka dei kaba la pynkha kat kum ka Act jong ka Parliament kaba la kren shai ba u pud jong ka Meghalaya u long kat kum ka jingpynwandur naka Act ba don. Ka State Reorganization Act, 1971, kan ai jaka ia ngi ban iakdew ia u pud u sam jong ka Jylla haba pynshong nongrim na ka jingiakren ba mynta” ula bynrap.
Hynrei ula ong pat ba ka Kynhun Myntri kam shym la iakren satia halor ka jingthaw biang ia ki Regional Committee ba kin pyntyllun shakhmat ia ka kylla ba-ar jong ka jingiakren pynbeit pud.
“Mynta ka sngi ngi la shu pynsngew ba ngi dang don sa hynriew tylli ki jaka ba iakajia ba ngin ia pynbeit bad kaei ka sienjam ba ngin shim kan shong eh ha ka Kynhun Myntri” ula pyntip.
