Bokajan, Naitung 25: Hadien ba la ioh ia ka jingtip ka ba bniah, ki bor pulit ka Karbi Anglong ki la ioh ban kurup ia shibun bah u drok heroin na ki artylli ki kali ha ki bynta khappud ka Assam-Nagaland hapoh East Karbi Anglong hynnin ka sngi U Blei.
Halor kane ka jingioh kurup na ka liang ki pulit ki la kem noh ia laingut ki briew ka ba kynthup ia kawei ka longkmie.
Katkum ki khubor la ong ba ki bor pulit ka Karbi Anglong hadien ba ki la ioh ia ka jingtip ka ba thikna halor ka jingdon jong ki nongkhaii drok, kumta ruh ki la pynlong ka jingap shrip bad lapdien ia ki artylli ki kali ha ki bynta jong ka Rengma Basti ka ba marpyrshah na khappud ka Assam-Nagaland, bad ha ka jingtalasi ia kine ki kali, ki pulit ki la ioh kurup haduh 99 ki song (50 song na ka kali EECO van ka ba don ia u registration number NL 07CB 2827 bad 49 song na ka Gypsy ka ba don ia u registration number NL07CA 5586) ki ba kit haduh 1.330 kilo u drok heroin.
Ha kane ka jingjia ki pulit ki la kem noh ia laingut ki briew ka ba kynthup ia kawei ka longkmie ba la tip kyrteng kum ka Avi ia ka ba ju khot Angela 25 snem rta, u Pavei Saichama 25 snem rta bad u Vieo 42 snem rta.
Katba ka Avi ka dei ka nongshong shnong jong ka New Minister Hill Kohima, u Pavei bad u Veio ki dei na ka shnong Tadubi ka ba hapoh Senapati district ka Manipur. Ha ba pynlong ia ka jingtohkit la shem ba kine ki briew ba la shah kem ki la wanrah ia une u drok na Manipur da ka ba pyndonkam ia ka lynti iaid na Rengma Basti ban ioh rung sha Assam khnang ban lait na ka jingshah khynra ha ki bor pulit ha Khatkhati.
Une u drok ba la ioh kurup u shongdor haduh kumba T. 10 klur ha ki jaka iew beain ka pyrthei.
Ia kane ka jingkhynra la pynlong hapoh ka jingialam jong u John Das, SDPO Bokajan, u OC Bokajan, Inspector Mwblik Brahma, OC Khatkhati SI (UB) Raju Duara, SI (UB) Atikur Rahman, SI (P) Swmdwn Sargiyari, ki staff ka APRG staff kumjuh ki staff ka Khatkhati PS bad ki bor pahara ka ASCOM C20 CRPF camp Bokajan bad kiwei.
