Itanagar, Naitung 25 :Ka jingshlei um ka ba la wan jia na ka jingther kynsan jong u ‘lapbah ka la wanrah ka jingjulor ka ba shyrkhei ha baroh ki bynta jong ka Tirap district ka Arunachal Pradesh ha kane ka sngi Saitjain ba la lah.
Ka leit ka wan lyngba ki lynti surok ha ki ba bun tylli ki shnong ki ba hap hapoh Tirap district ki la shah ktah jur namar ka jingshlei um ka ba la wan jia na ka jingther kynsan jong u ‘lapbah.
Ka thain Deomali bad ka Namsang ki ba hapoh Tirap District la ong ba ki dei ki thain ki ba la shah ktah jur ha kane ka jingjia. Ki ba bun ki jaka ba sha them hapoh Tirap district ki la shong halor ka um.
Ka KVK, government upper primary school ha Deomali, bad ki bynta jong ka Noksan bad ka Batey ruh ki la shah ktah jur ha kane ka jingshlei um.
Ha kane ka jingjia ki jaka rep slasha bad ki pung dohkha ruh ki la shah pynshlei ha ka um bad ka ba la wanrah ka jingduh ka ba khraw ia ki paid nongrep hapoh Tirap district ka Arunachal Pradesh.
Watla katta ym shym la don ba iap ne ba mynsaw ha kane ka jingjia. Kane ka jingshlei um ha kawei pat ka bynta ka la sdang hiar naduh hynnin ka jan miet sngi U Blei. Ki bor sorkar ki la kyntu ia ki nongshong shnong ha kito ki jaka ki ba la shah ktah jur ba kin long ki ba husiar.
Na ka liang u Deputy Commissioner ka Tirap district u Taro Mize u la ong, “Namar ka jingther kynsan u ‘lapbah ka thain Deomali bad ki shnong ba marjan jong ka ki la shah ktah jur ha ka jingshlei um. Ka jingpynbha pat ia ki jingjulor ka la iaid shakhmat. Na ka liang ka kynhun aijingiarap ka SDRF kumjuh ka tnat PWD bad Tnat Water Resources ki la iaid shakhmat ha ka ba iadei bad ki jingmaramot bad ki kam aijingiarap.”
Shuh shuh u la ong ruh ba ia mynta hi kim pat lah ban aijingkhein ha ka ba iadei bad ki jingshah pynjulor, bad na ka liang u ADC ka Deomali u la bishar bniah halor ki jingjulor bad halor ki jingduh na kane ka jingshlei um.
