Haflong, Naitung 25 : “Ka sorkar BJP ka la pyndonkam bakla ia ka tnat Enforcement Directorate (ED), CBI lane ia ka Income Tax Department, bad kumta ruh tang ki nongialam liang pyrshah ki ba la shah jied ban kylla long ki sohpdung,” ong u President ka Assam Trinamool Congress u Ripun Bora ha ba jubab ia ki jingkylli na ki nong pathai khubor halor ka jingioh kurup ia ka pisa ka ba haduh T.20 klur na ka iingsah ka ba haiing jong u myntri ka Trinamool Congress ka West Bengal u Partha Chattopadhyay.
U Bora u la pynpaw ia kane hadien ka jingplie ia ka district office jong ka Trinamool Congress ha Mahadevtila ka ba hapoh ka headquarter jong ka Dima Hasao district hapoh Haflong. U Ripun Bora u la wan poi ha Haflong ha kane ka sngi Saitjain ba la lah.
U Bora u la plie ruh ia ophis ka Trinmail ha Mahadev Tila hapoh Haflong. Hadien u la iashim bynta ha ka jingialang jong ki nongtrei ka party ia ka ba la pynlong hapoh District Library ha Haflong. Kumba shispah ngut ki briew ki la wan ban pyniasoh bad ka Trinamool Congress ha katei ka jaka.
U Ripun Bora u la ong; “Ka Trinamool Congress ka la wan iuhkjat ha kine ki thain jaka lum dang kumba lai bnai ei ei bad tang hapoh lai bnai kane ka party ka la kiew sted ha ka ba ki la don haduh palat 150 ngut ki dkhot hapoh Dima Hasao district.Na ka liang ki riew paidbah ki kwah ia ka liang pyrshah ka ba khlain.”
