Shillong, Nailar 08: U samla na Ampati, u Klingson Marak ula ioh ban thep ia ka kol jong ka India ha ka jingiakhun pyrshah ia ka lahduh ha ka pyrthei ka Argentina ha ka lympung ialehkai jong ka IBSA Blind Football World Grand Prix kaba long ha Mexico.
Dei tang katei ka kol ba ioh thep da u Klingston ba ka Argentina ka shah thep naduh ba sdang jong ka lympung.
Ha katei ka jingialehkai ba la tip kum ka International Blind Sports Federation, u Klingston u la lah ban pyni shisha ia ka jingtbit jong u ha katei ka lympung ialehkai phutbol naduh kaba sdang haduh ban da kut ka jingialehkai.
Utei u samla naduh mynshwa u la pyni ruh ia ka jinglah jong u wat ha ki lympung jong ka state level bad wat ha ka National level ruh.
Dei namar ka jingtbit jong u, ba utei u samla rit na West Garo Hills u la shah jied syndon ban ialam ia ka kynhun kum u kapten ha katei ka lympung kaba long ha Mexico.
Ryngkat bad u Klingston la don ruh sa uwei pat u rangialehkai na Meghalaya uba la don bynta bad ka kynhun, kata u Gabriel Nongrum ha kaba ki la ioh ban iakhun lang ha katei ka Blind Football World Grand Prix ha Mexico.
Kitei baroh arngut kiba dei ki khun jong ki nongrep ki la don bynta bad ka kynhun ialehkai ka India la bun snem.
Ha katei ka lympung, ka India ka la hap ban iakhun pyrshah ia ka Mexico kaba dei ka trai jaka, nangta ka Costa Rica bad ruh ia ka lahduh ha ka pyrthei ka Argentina nalor ka Brazil.
Hynrei sniewbok , ka kynhun ialehkai ka Ri ka la shah rem ha baroh ki jingialehkai lait noh tang ia ka Mexico bad Costa Rica kiba ka jingiakhun ka long mar ia biang bor bha.
