Nongpoh, Nailar 08: Ka jingpynibor ki pulit ka Assam ka la nang ïai bteng ha ki thain khappud ka Raid Nongtung, Block II, Ri Bhoi District da ka jingleit khang jubor biang ia ka jingialang paidbah ba thmu ban pynlong da ka Seng Samla Border Area (SSBA) ha Jatalong myn ha ka sngi saitjain bala dep.
Ka SSBA kala khot ia kane ka jingialang paidbah da ka jingthmu ban ioh iakren halor ki mat ba iadei bad ka jingiapynbeit ia u pud u sam hapdeng ka sorkar Assam bad Meghalaya bad ruh halor ka jingwan sieh nar elektrik jong ka ASEB ha Jatalong bad Sabuda, kiba don hapdeng ka jingiakajia pud.
Ka SSA hapoh ka jingialam u samla Hilarius Lynshang kum u President, kala sdang ban pyniaid ia ka jingialang ha ka por ba ki Pulit ka Assam kila wan ban phah pynsangeh jubor khlem da ailad shuh ban pyniaid shakhmat.
Kine ki Nongialam ka SSBA kila pynrem jur ia ka jingwan pynibor jong ki Pulit ka Assam, kaba la khanglad ia ki nongshongshnong ka thain ban iakren halor ka kam iapynbeit pud hapoh ka thain, kaban hap ha ka bynta ba-ar ne ka Phase-II jong ka jingiakren pynbeit pud hapdeng ka Sorkar Assam bad Meghalaya.
“Kane ka jingwan pynibor jong ki Pulit na Assam ka pyni shai ia ka jingthmu ban klun jubor ia ki jaka ki puta jong ka Jylla Meghalaya” ong ki Nongialam ka SSBA.
Kila pynpaw ruh ia ka jinglyngngoh ba ki Pulit ka Assam tang mar syn ioh jingtip halor kane ka jingialang, kila wan mareh bran bran sha ka Shnong Jatalong ban pynsangeh da kaba ai daw ba kim kwah ba kan mih kano kano ka huri hura.
Halor kane ka jingjia, ka SSBA kala rai ban sa lum biang ia kane ka jingialang paidbah hadien ka jing rakhe ia ka sngi Laitluid ka Ri India, ia kaba yn sa pyntip thikna ia ka Tarik bad ka jaka ban pynlong.
