Shillong, Nailar 30 : Ka Seng Samla Mawlai Pyllun ha ka 26tarik mynta u bnai ka la pynlong ia ka prokram ai jinghikai ba shisngi ia ki khynnah bad samla halor ka Ka phang “Drugs avoidance, Sex Education, life skills”, kaba la pynlong ha NEHU Convocation Hall.
Haduh 22 tylli ki skul na Mawlai kila wan shim bynta bad ban ioh ia ka jingpynshai na ki riewshemphang halor kine ki jingsniew kiba ktah shimet bad ruh ia ka imlang sahlang.
Ki riewshemphang kiba wan ban ai jingpynshai ki kynthup naduh ka Kripa Foundation kaba la ai jingkren da i kong Riyoka Surong, Sakani Kyndiah, Gracefulness Thongni, i Iada Uriah bala wan ai jingpynshai na ka Meghalaya Aids Control Society, i Dr Ryntihlin Jennifer War head of the Centre for GENDER (Gender Equity and Diversity Education and Research), bad Dr Ardoniser Lyngdoh na Martin Luther Christian University.
Katkum ka kyrwoh la ong ba ka jingthmu jong katei ka seminar ka long ban ai jinghikai ia ki khynnah skul ba dang khie kumno ba kin ym ngop ha ki jingshah pynshoi ban dih drok bad kiwei ki jingdih basniew, kumjuh ruh ban ym shah pynngop ha ka shongkha khynnah, nangta ban tip kumno ban lait naka shah thombor, bad kiwei kiwei.
Ia kane ka seminar la wan ban plie da u Sujit Sangma Dy. SP East Khasi Hills bad la pynhap pyrda pat da i kong Mebashisha Warjri na ka tnad Social Welfare East Khasi Hills.
