Tura, Nailar 30: Ki Pulit ka Tura kila ioh ban kurup ia ka shithi dawa pisa jong ka Garo Students Union (GSU) bala suba jur ba ka dei na ka kynhun jong u Tengsak G Momin, kaba dawa ia ki Nongkhaii ka Tura ban siew ia ka bai snem kumba la iakut bad kane ka Seng.
Ki Pulit kila pyntip ba ia kane ka shithi bala thoh ha ka Letter Pad jong ka GSU la soi da u Tengsak G Momin. Ki Pulit kila sei hakhmat ki lad pathai khubor ia kane ka shithi bad ong ba kane ka dei ka kam dawa pisa jubor jong kane ka seng hynrei kila kyntait pat ban pyntip ia ki nongkhaii kiba iohpdiang ia kine ki shithi.
Ha ka shithi, ka ong “Kumba la iakut snem, nga kyrpad ban siew T.15000 na ka bynta u snem 2022 ban pyndonkam da ka Union. Ngi da sngewnguh ia ka jingiatreilang”.
“Kane ka dei kawei pat ka kam dawa pisa kaba jia ha Iew Tura ha kaba ki Nongkhaii bad ki nongshong dukan kila shah pynbor ban siew pisa bad ka dei ruh ka daw ba ki riew paidbah kila hap ban thied ia ki marbam mardih ha ka dor kaba rem” ong u Vivekanand Sing Rathore, Superintendent of Police ka West Garo Hills.
Une u Heh Pulit u ong ba ka Ain kan leh da kaba tyngeh ia kino kino kiba donkti ha ki kam dawa pisa ban pynthikna ba ki paidbah ka sor Tura kin ioh ia ka marbam mardih bad kiwei kiwei ki mar ha ka dor kaba dei hok.
Une u Heh Pulit um shym la pynthikna ia ka jingdonkti jong kiwei ha kane ka kam bymman, hynrei ia mynya u ong ba na ki sakhi kiba paw, dei ka GSU kaba ialam da ka Tengsak G Momin kaba leh ia kane ka kam.
Ka GSU kumba long mynta kala pait arkynhun-kawei kaba kyrshan ia ka kynhun u Zikku Balgra Marak bad kawei pat ia u Tengsak G Momin. Kane ka jingiapait kala jia hadien ba u Tengsak ula kyntait ban hiar naka shuki President bad kyntait ruh ban pynlong ia ka elekshon.
Ka jingpyrshah ia u Tengsak ka long ba um dei shuh u samla pule lane u dkhot jong kano kano ka College ne University bad ula kyntait ban pynlong ia ki elekshon jied Nongkitkam.
