Guwahati, Nailar 08 :Kawei ka khynnah ialehkai boxing na Moranhat, Assam ka ba la shah set phatok halor ka jingkynnoh aijingkyrshan ia ka kynhun seng lehnoh ba la khein beain, ka United Liberation Front of Asom-Independent (ULFA-I), ka la ioh jamin na ka iingbishar.
Kane ka nongialehkai boxing ba 23 snem rta, ka Maina Chutia ka la shah kem noh halor ka jingkynnoh kynthoh lyngba ka Facebook post, ha ka ba ka la pynpaw ka jingkyrshan ia katei ka kynhun seng lehnoh.
Ha katei ka jingkynthoh ka Chutia ka la pynpaw ia ka jingdon mon ban pyniasoh ia lade bad ka ULFA (I), kata hadien ba ka la shah kem noh katkum ki kyndon ain.
Katkum ki lad pathai khubor la ong ba kane ka khynnah ka la leit lyngba ka Facebook da ka ba thoh, “Lada nga ioh ia ka lad, ngan pyniasoh bad ka ULFA. Nga ieit ia ka seng ULFA-I.”
Hynrei, hadien ba ka la shong phatok shi bnai shiteng, ka kashari ha Charaideo district ha ka sngi Thohdieng ba la lah ka la ai jamin noh ia ka Chutia.
“Ka long ka ba shem shitom ban pynlut por bun bun sngi hapoh ka phatok, hynrei nga la lah ban sngewthuh katto katne shaphang ka jingbha ha kane ka jaka,” ong ka lad pathai khubor ka ba la shim ia ka jingkren jong kane ka khynnah.
Dang shen, ka iingbishar Gauhati High Court ka la pyllait jamin noh ia ka Barshashree Buragohain ka ba la shah set phatok haduh ar bnai halor ka jingkynnoh aijingkyrshan ia ka seng lehnoh ULFA lyngba ka Facebook.
Kane ka samla pule kolej ka la shah kem noh naduh ka 18 tarik u Jymmang ba la dep na Uriamghat ha Golaghat district bad shah pynngat ha ka UAPA namar katei ka jingpynpaw jingkyrshan ka jong ka lyngba ka poetry ka ba ong, “Hato kan dang don ka jingialeh pyrshah ia ka Ri sa shisien pat.?”
