Imphal, Nailar 08 : Ki bor pahara ka Jylla Manipur ki la lapdien ia kawei ka karkhana pynmih drok na Jylla bad ioh kurup shibun bah u drok cocaine hynnin ka sngi U Blei.
Ka jingkhynra da ki bor pahara ka Indian Reserve Battalion (IRB), ki dkhot ka Narcotics and Affairs of Border (NAB) ryngkat ki bor pulit ka Lilong ha Manipur, ki la ioh ban kurup haduh 54.685 kilo u drok cocaine u ba shongdor haduh kumba T.82 klur ha ki jaka iew beain.
Ia kane ka jingkhynra la pynlong hapoh ka iingsah jong kawei ka longkmie ba la tip kyrteng kum ka Imem Bibi ha Lilong Chingkham Makha Leikai ka ba ha Thoubal district ka Manipur.
Na ka liang ki bor pahara ki la lapdien ruh ia uwei u briew ba la tip kyrteng kum u Yumkhaibam Mustafa u ba donkti ha kane ka kam pynmih drok beain na kane ka jaka.
Nalor u drok, ki bor pahara ki la ioh ruh ban kurup noh ia shibun bah ki tiar ba la pyndonkam ha ka ba pynmih drok, kata kum ki chemical, ki tyndong lyer shet bad kiwei pat nalor ka mobile phone.
Ia une u briew la aiti noh sha ki bor pulit ka Lilong police station ha Manipur na ka bynta ban leh ia ka ba donkam.
