Agartala, Nailur 23 : Ka jingkhlain jong ka kynhun synrop BJP-IPFT kala hiar biang sa shisien pat hadien ba u MLA ka BJP u Burba Mohan Tripura ula iehnoh kam na ka iingdorbar assembly ka jylla.
Ia u Burba la synran lang da u Chairman ka TIPRA u Pradyot Kishore Debbarman ha katei ka jingleit aiti ia ka shithi iehnoh kam.
U Tripura un leit ban pyniasoh noh bad ka TIPRA mynta ka jan miet sngi Thohdieng.Kane kala wan long ruh ka jingduh kabakhraw na ka bynta ka party synshar ha ka jylla.U Tripura u dei u MLA jong ka Karbook assembly constituency.
Kane ka jinglong jingman kala wan long ruh lai sngi hadien ba u MLA ka IPFT u Brishaketu Debbarma ula shah pynduh noh ia ka jinglong MLA ka jong u napoh ka iingdorbar assembly ka Tripura.
U Debbarma uba dei u MLA na Simna constituency ha Tripura, ula phah ia ka shithi iehnoh kam jong u lyngba u nonglamktien, kaba long ka jingpynkhein ia ki kyndon ain,” ong u Lamphang ka iingdorbar ka Tripura, u Ratan Chakraborty lyngba ki lad pathai khubor hynnin ka sngi ba Ar.
Khyndiat por hadien ba ula leit ban pyniasoh bad ka TIPRA, na ka liang u president ka IPFT ula phah da ka jingujor sha ka ophis jong u Lamphang ka iingdorbar assembly ka Tripura na ka bynta ban pynkhein noh ia ka jinglong MLA jong u Debbarma namar ka jingpynkhein ia ki kyndon treikam jong ka party.
U Lamphang ha ka jingpynmih hukum ka jong u, ula pynpaw shai ba ki sakhi satar kiba ula ioh pdiang ka la pynpaw ia ki jingshisha ba u Debbarma ula pynkhein ia ki kyndon treikam jong ka party IPFT bad ia ki kyndon treikam kiba iadei bad ki kam ialeh pyrshah party kumba la pynpaw da u hehduh ka IPFT, u NC Debbarma.
