Shillong, Lber 18 : U Nongialam ka BJP bad Myntri ka Sorkar Bah AL Hek hynne ka sngi Ba-ar, ula pynpaw ba un kohnguh ia ka rai kaba shim da ka seng ha kaba iadei bad ka mat ban ia bujli ia ka shuki Myntri Sorkar bad u MLA ka seng.
“Ia katei ka jingkylli phi lah ban kylli na u President ka BJP Meghalaya ym na nga. Ngam lah ban ong eiei ia phi halor kane namar ba ka dei beit ha ka seng ban shim ia ka rai. Ngan kohnguh beit ia ka rai jong ka seng,” ong u Bah Hek haba iakren bad ki nongthoh khubor.
Ha ka samoi kaba la dep, ia ka shuki myntri la ia shong bujli hapdeng u Bah AL Hek bad u MLA ka South Shillong u Bah Sanbor Shullai.
