Shillong, Lber 31 : Ka Tnad Meghalaya Police ha ryngkat ka jingiatreilang bad ka Ministry of Home Affairs (MHA), kila pynlong ia ka State Level Conference ba shisngi halor ka jingiakhun pyrshah ia ki kam khaii briew, hynne ka sngi thohdieng ha State Convention Centre, Shillong.
Kiba bun ki riew pawkhmat kila wan iashimbynta ha kane ka dorbar bad kine ki kynthup ia u Director General of Police (DGP) LR Bishnoi, Chairperson ka Meghalaya State Commission for Protection of Child Rights Iamonlang Syiem, bad Director of Meghalaya State Judicial Academy KML Nongbri.
Ha kane ka dorbar, u DGP Bishnoi ula kren halor ki jingeh ba iakynduh ha ka jingtohkit ia ki kam khaii briew bad ka jingduna ha ka jingpynngat ia ki nongleh bymman ha ki jingpynsajia. Ha kine ki hynriew snem bala leit, tang 19 tylli ki case la register ha Meghalaya ha kaba napdeng kine, tang 3 ne 4 kila ngat ha ka jingpynsajia.
Une u Khliehduh ka Tnad Pulit ula kren ruh ha ki daw ba lam sha ka kam khaii briew bad ong ba ka jingduk, ka jingbym ioh kam iohjam, ka jingduna ki lad iohkam, ka jingsahdien ki thain, ka jingduna ki kam pynroi ki dei napdeng na ki daw ba pynshlur ia ki nongleh bymman ban iohlad ha kaban pynngop ia ki briew. Ula ong ba ka jingbun ki longiing ba iapait iapra bad ka jingbun ki Kmie ba ri khunrei ka dei ruh ka daw kaba buh ia ki Khynnah shynrang bad Kynthei ha ka jingjynjar bad pynlong ia ki, kiba suk eh ban pyniaid sha ka kam khaii khynnah.
Ula ong ruh ba ka jingduna ka lad iohkam iohkam ka pynsuk ia ki nongleh bymman ban pynbiej ia ki briew ha ka aikam aijam na kawei ka jaka sha kawei pat. U Bishnoi ulakren ruh ia ka jingeh ban ai jingiarap ia ki samla ba ioh pyllait namar ka jingbym don ia ki Iing ban pynsah ia ki ha Meghalaya.
Ban tehlakam ia kane ka kam khaii briew, u Bishnoi ula ban jur halor ka jingdonkam ban pynsngewthuh ia ki nongshongshnong bad ki riew shimet, ban iatreilang hapdeng ki kynhun bapher bapher bad ka kamram ba kongsan eh jong ki lad pathai khubor.
