Tura, Lber 31 : Ki Nongshongshnong jong ki Shnong kiba hap hapoh ka Resubelpara Block, North Garo Hills, kila gherao ia ka Block Development Officer (BDO) bad pyrta slogan ba kynnoh ba ka pynduna ia ka sngi bylla jong ki Job Card Holder hapoh ka Mahatma Gandhi National Rural Employment Scheme (MGNREGS).
Kane ka jingiakhih paidbah kala mih hapdeng ka Social Audit Hearing halor kane ka skhim ba long ha ka sngi Palei.
Ki nongshongshnong kila buhnud ba bun kim shym la ioh ia ka hok ban trei bylla kat kum ka sngi bylla ba 100 sngi ha ka shisnem.
Don kiba kam ba kila ioh ban bylla tang 30-40 sngi ha ka shisnem bad kynnoh ia ki Nongpyniaid ka Block ba kim lah ban pynbiang ia ka jingai bylla kat kum ka skhim.
Ka BDO kala pyrshang ban pynsngewthuh ia ki bad batai ruh ia kiba bun ki jingdonkam haba iadei bad ki job card bad ruh ki sngi bylla haba kular ba kan sa khmih ia kane ka kam. Hynrei kane kam shym la pynhun satia ia ki nongshongshnong.
Namar ka jingbym lah pynjai jai, la hap ban khot ia ki Pulit ban tem ia u paidbah uba dwa ia ka jubab ba balei ba pynduna ia ki sngi bylla haba kynnoh ruh ia ka BDO ba ka leh ia kane ka kam.
U Deputy Commissioner RP Marak ula pyntipp ba ula bthah ia u Project Director ka DRDA ban shong bishar ia ki jingkam u paidbah bad ban aiti ia ka kaiphod kham kloi kat kaba lah.
