Guwahati, Lber 26: Ka sorkar Assam hynnin ka sngi Saitjain ka la iasoi ia ka MoU bad ka Big Charter Private Limited (Flybig) na ka bynta ban pyniaid liengsuin lyngba ki kad liengsuin kiba hap hapoh ka non-Udan sector.
Ka Flybig kan pyniaid liengsuin hapdeng ka Guwahati-Dibrugarh-Guwahati bad ruh hapdeng ka Guwahati-Silchar-Guwahati man ka sngi.
Na ka liang u managing director ka Assam Tourism Development Corporation u Kumar Padma Pani Bora bad u director ka Flybig u Sanjay Natavarlal Mandavia ki la iasoi ia kane ka soskular ha ka jingiadon lang u myntri rangbah (CM) Himanta Biswa Sarma.
Na ka liang u CM Sarma u la ong ba ka jingdon jong ki liengsuin ki ban aijingshakri man la ka sngi kan pynsuk bad plie lynti ha kaba iadei bad ka jingpyniasoh bad kiwei pat ki thain ha ka jylla.
U CM Sarma u la ong ruh ba kane ka jingshakri kan pynthikna halor ka jingpyniasoh kumjuh ha kaba iadei bad ka dor bai shong liengsuin kumba la rai ka ban ym palat ia ka T. 4000.
