Itanagar, Naitung 22 : Ka Tenzin Chonzom ka ba la pass ia ka eksam Union Public Service Commission (UPSC) Civil Service Examination 2021, ka la shah pdiang sngewbha ha u Lat ka Arunachal Pradesh, u Brig (Retd) Dr BD Mishra hapoh Raj Bhawan ha ka nongbah.
U Lat u la ai khublei kyrpang ia ka Chonzom namar ka jingtrei shitom ka jong ka ha ka ba iadei bad ka jingpule, ha ka ba ka la lah ban pass ia ka eksam ka ba eh tam hapoh ka ri.
U la ong ruh ba kane ka jingjop ka jong ka, kan ai mynsiem bad pynshlur ia kiwei pat ki samla ka jylla ba kin ioh ia ka jingjop ha ki ba kum kine ki eksam.
Ha ba pynapw ia ka Chonzom kum ka khlur ba pawkhmat ka jylla, u Mishra u la aijingmut ruh ia ka ba kan long ka nong ai mynsiem ka ba hakhmat eh na ka bynta ki khynnah pule, kata khamtam na ka bynta ki kynthei ba kin trei minot bad ban iakhun bad pass ia ki eksam Civil Service.
Nalor kata u Lat u la kyntu ruh ia kane ka samla ba kan leit jurip ia ki skul bad ki kolej bad ban pynshlur ia ki samla ba kin trei shitom bad ban ia aireng ha ki eksam ki ba dei jong ka ri India baroh kawei bad ha ka jylla kumjuh.
Ha kane ka jingialang la ia don lang ruh u kpa jong ka Chonzom u Sang Phuntso u ba dei u secretary ka hydropower ha ka jylla.
