Shillong, Jymmang 18 : Ka Khasi Jaintia Christian Leaders Forum (KJCLF) hynne ka sngi Palei kala iaroh ia ka rai jong ka Sorkar ban sdang noh ia ka jingiakren iasuk ba shongain (Official) bad ka kynhun kiengatiar Hynniewtrep National Liberation Council (HNLC).
“Ka KJCLF ka phah ia ka jingsngewnguh halor ka jingpynbna u Myntri Rangbah ka Jylla ba ka jingiakren iasuk hapdeng ki lai mamla, la buh ban sdang noh naduh u Jylliew 2023” ong u Rev Dr Edwin H Kharkongor, Secretary ka Forum ha ka kyrwoh.
“Ia ki nongshongshnong ka Jylla jong ngi, ka jingthrang bad jingangnud ia ka jingsuk ka dei kaba la slem bha” ula ong haba bynrap “Ka KJCLF ka ia ka jingithuh bad ka burom ia kane ka sienjam ba khraw bala shim da ka HNC bad kumjuh ruh ki arliang mamla kiba don bynta bad duwai ruh ba kan long kaba seisoh”.
Ha ka sngi Balang, u Myntri Rangbah ka Jylla Conrad K Sangma ula pynbna ba ka jingiakren iasuk ba shongain bad ka HNLC kan sdang noh ha ka taiew ba nyngkong jong u bnai ban wan.
Hadien ba pyniaid ia ka jingialang ka Kynhun Myntri, u Conrad ula pyntip ba u Symbud Myntri Rangbah ba khmih ia ka tnad kam pohiing (Police) Bah Prestone Tynsong ula shong iakren bad u Political Secretary ka HNLC, u Vice Chairman bad Executive Member ha ka sngi Ba-ar ha ka jingiadonlang u ksiang Bah PS Dkhar.
“la shim rai bad la aiktien ba ka jingiakren iasuk ba shongain bad ka HNLC kan sdang noh haka taiew ba nyngkong u bnai Jylliew” ong u Conrad.
