Nongstoin, Jymmang 18: Ha ka 17 tarik u Jymmang 2023, ka kynhun jong ki nongrep ka thaiñ Mawshynrut ki la leit ban ïakynduh ïa u Deputy Commissioner ka West Khasi Hills bah Garod LSN Dykes ban aiti ïa ka dorkhas ba dawa SDO ba pura na ka bynta ka Mawshynrut Civil Sub Division.
Ha katei ka sngi la ïadonlang u bah Pascal Dkhar President ka Hill Farmer’s Union Mawchynrut Block Unit ha ka jingiadon lang u bah Zacheus Tympuiñ President Hill Farmer’s Union West Khasi Hills District Unit, u bah Dabul Singh Thabah President Hill Farmer’s Union Sohïong pyllun bad kiwei kiwei ki dkhot jong ka seng.
Ha ka jingïakren bad u nongthoh khubor ka Shlem, ka kynhun ka la ong ba ka jingplie ïa ka Civil Sub Division ka la kynjoh sha ki 6 snem kynthi, hynrei, kat haduh mynta mynne katei ka ophis kam shym pat la lah ban pyntyllun bha ïa ka rukom treikam ha kiba bun ki bynta.
Ula ong ba ka daw ka dei namar ka jingbym pat don u SDO ba pura, hynrei la shu khmih lang tang da uwei u ophisar ba shu peit kum u inchrage.
Ka HPU ka la ong ruh ba ka jingdon jong u SDO ba pura kan pynsuk ïa ki paidbah ban pyndep ïa ki kam kiba dang sahteng. Namar ki paidbah jong ka thaiñ haba ki leit ban wad ïa u SDO kim ju lap ha ophis bad ki la hap ban pynsepei ïa ka por bad ka bai kali, haba ki hap ban wan na ki shnong kiba jngai bad na nongkyndong.
