Shillong, Jymmang 18 : U Myntri Khynnah jong ka Sorkar Pdeng uba khmih ia ka tnad Chemicals & Fertilizers bad New & Renewable Energy, u Bhagwanth Khuba hynne ka sngi Palei, ula leit sha Nongstoin, West Khasi Hills District ban khnih bniah ia ka jingpyntreikam ia ki skhim jongka Sorkar Pdeng ha katei ka thain jong ka Jylla.
U Myntri ula peit ia ka jingpyntreikam ia ki skhim bad ula iakynduh ia ki nongmihkhmat jong baroh ki tnat bad ki bor distict.
“Mynta ka sngi nga la peit ia ka jingpyntreikam jong ki skhim jong baroh ki tnad Sorkar bad ka bor district,” la ong u Khuba.
Ula ong ba ula hun ia ka jingpyntreikam iaki skhim bapher bapher bad kila don ruh katto katne ki jingkhuslai hynrei la dep iakren bad pynbeit noh ia ki jingeh.
Une u Myntri ula kren shaphang ki skhim solar PM KUSUM bad ula iathuh ba ki don shuh shuh ki subsidy na ka bynta ki jylla ka thain shatei lammihngi.
“Ka skhim KUSUM rooftop ka dei kaba don ha baroh kawei ka ri. Ngi la ai subsidy shuh shuh ha kine ki jylla ka thain shatei lammihngi. Baroh ki skhim kiba iadei bad ka thain shatei lammihngi kidei kiba ngi peit thuh bha, ki don shuh shuh ki subsidy ki ban ai jingmyntoi ia ki briew. Nga kyntu ia ki bor distrik ba kin shim shuh shuh ia ki jingmyntoi na ki skhim MNRE,” la ong u Myntri haba haba ai jingkren ha Nongstoin.
U Myntri ula pynlong ruh ia ka jingialang bad ki briew bad ki rangbah shnong na Nongstoin kiba la batai ia u shaphang ki jingeh bapher bapher bad ula pynthikna ba yn shim lut ia ki sienjam ban pynbeit ia kitei ki jingeh.
Ha ka jingiakren bad ki lad pathai khubor, u Myntri ula ban biang shaphang ka jingpeit bniah bad ka Sorkar Pdeng ban kyntiew ia ka thain shatei lammihngi ha ki kam bapher bapher naduh ka jingkyntiew ia ki jingdon jingem kum ki surokbah, ka jingpynpoi surok sha ki shnong, ka jingpynioh ia ka um kaba khuid lyngba ki kor bad kiwei kiwei.
“Mynta hadien 9 snem, ka thain shatei lammihngi kala iaryngkat kyrdan bad kiwei kiwei ki jylla jong ka ri.” ong u Myntri bad ka bynrap ba ka Sorkar Pdeng kala pynthikna ba ki Myntri Sorkar Pdeng kin wan jngoh ia ki jylla ka thain shatei lammihngi man ka ar taiew ban pynthikna ba kan don ka jingpyntreikam kham sted ia ki prokram jongka Sorkar Pdeng.
Hadien katei ka jingialang, u Myntri Khynnah ula leit ruh sha Mawkawah Anganwadi Centre, Sibsingh Memorial Govt School Nongpyndeng bad Mawlieh Sub-centre mynta ka sngi ha kaba ula iakren bad kitei kiba la ioh jingmyntoi na ki skhim ka Sorkar Pdeng, kiba kynthup ruh ia ka PM AWAS Yojana bad ula shem ba ka la don ka jingpyntreikam bha ia ki skhim.
U Khuba ula kyntu ia ki bor distrik ba kin pynthikna ba baroh kiba dei ban ioh jingmyntoi kin ioh ia katei ka jingnyntoi.
