Shillong, Nailar 28: Ka Sorkar Meghalaya kala sdang pyntreikam ia ka “Meghalaya Mandi,” ka Ïew Digital da ka jingthmu ban pyniasoh ia ki nongrep beit beit bad ki nongthied, ki kynhun kiba pyniaid iew bad ki nongpynkit ban pynkhlain shuh shuh ia ki lad ban pyniaid iew ia ki marrep jong ki nongrep.
Ia kane la pyntreikam da ka Department of Soil & Water Conservation, ka rynsan kaban kynthup ia baroh 12 district bad ia palat 13 tylli ki jait jingthung kiba kongsan ne Cash Crops. La pynwandur ban kyntiew ia ka jingkhuid bad ka jingshai kdar ha ka rukom buh dor, ban pynduna ia ki kynhun ne ki briew kiba long pdeng ban pyniaid ia ki marrep bad ban pynkhlain ia ka jingiadei hapdeng kiba donbynta ha ka kam khaii pateng.
Ia ka rukom pynwandur la leh ha kata ka rukom ba kane ka ‘Application’ kadei kaba la Design bad Coded da ka jingdonbynta beit beit da u Dr Joram Beda, Commissioner and Secretary jongka Soil & Water Conservation Department. Kane ka rynsan la pynwandur da kaba pynkylla ia ki jingtynjuh kiba la mad da ki nongrep bad ki nongkhaii sha ka jingpynbeit lyngba ka kor Digital kaba la ialam da ka Sorkar.
Kane ka sienjam kadei halor ka jingpyrshang ia ka jingpyniasoh ia ka iew kaba 5 bnai kaba la leh ha North Garo Hills hapoh jongka Meghalaya New and Renewable Energy Development Agency (MNREDA), hapoh ka jingialam u Chairman u Rupert Momin bad u Dr Beda.
Kane ka projek kaba dang shu sdang kan plie lad ia ka jingdie beit beit kumba 330 MT ki marrep, kaban kynthup ia 180 MT u Sying, 100 MT ka Kait, 30 MT u Sohtrun bad 20 MT u Shynrai kaban ai jingmyntoi ia 800 ngut ki nongrep.
Katkum ka jingpyntip ka tnad sorkar, kane ka rukom khaii kala lah ban pynmih kumba T.1.5 Klur ha ka dor khaii bad lam sha ka jingantad kaban kot T.78 lak ha ka jingioh shuh shuh ia ka kamai na ka bynta ki nongrep kiba iashimbynta, khlem da donkam eiei ban pynlut ia ka pisa jong u paitbah.
Haba kren ha kane ka jingplie, u Myntri ka Tnad Soil & Water Conservation u Marcuise N. Marak ula ong, ba ki digital technology ki lah ban iarap ban weng ia ka jingduna hapdeng ka jingpynmih ki nongrep ha nongkyndong bad ki nongthied da kaba plie lad ia ki nongrep ioh ia ka dor kaba kham bha na ka bynta ki marrep kiba remdor kum u shynrai Lakadong, Sying, Sohtrun bad Sohniamtra.
Ula kyntu ia ki nongrep ba kin pyndonkam thikna ia katei ka rynsan ban poi sha ki iew ki hat bad ban pyniaosh bad ka sienjam bad ka jingiohi jngai jong u Myntri Rangbah ka Jylla u Conrad K. Sangma ban kynjoh ia ka ioh ka kot kaba $10-billion hapoh u snem 2028, ryngkat bad ka banjur ba ka jingkiew ka ioh ka kot kadei ban pynkylla ia ka jingioh bun shah ia ka kamai kajih bad ka rukom im kaba khlain bad kaba ioh ia kiba bun ki lad na ka bynta ki nongrep.
U Rupert Momin, MLA ka Kharkutta bad Chairman ka MNREDA, ula pynpaw ia ka jingdonkam ban don ia ki iew ki hat kiba neh kiba pyniasoh ha North Garo Hills, khamtam ha kaban shimkhia ia ka jingmih ki jingtynjuh kum ka jinghiar ka dor ka mur, ka jingrem jong ka jingpynkit ia ki marrep bad ka jingphiah ia ki jingpynmih ha kiba bun ki bynta.
Ia ka jinglah ban pyniasoh beit beit bad ki iew ki hat la pyni ruh ha ka jingplie da ka jingphah ia ka Kait kaba 13-MT sha ka Himalayan Food Company, Jamshedpur. Ia kine ki marrep la thied ha ka dor T.120 shi nat khlem da khein ia ka jingheh ne jingrit ka jongki, kaba ai ia ki nongrep ia ka dor kaba biang bha.
Ki nongthied kiba iadonbynta ha kane ka sienjam, kila kdew ia ka jingjur jong ka jingdawa ha kylleng ki iew ki hat ha ri India ia u Sying, Shynrai, Sohtrun bad kiwei kiwei ki marrep bad kumjuh ruh ia ki kabu ban kamai shuh shuh bad ban khaii shabar.
Da ka jingsdang ia kane ka jingpyrshang ia kane ka projek ha North Garo Hills mynta yn sa sdang ruh ban pyniar ha kylleng jong ka jylla, ka Meghalaya Mandi ka long ka dak jong ka jingpynkynriah ia ka die ka thied hapoh ka district da kaba pyniasoh bad ka rynsan ha ka jylla baroh kawei, da kaba wanrah lang ia ki nongpynmih, nongthied, ki kynhun kiba pyniaid iew bad ki nongpynkit hapoh jong kawei ka rynsan jong ka iew ka hat.
