Shillong, Nailar 28: Ym duna iaka 97,852 ngut ki samla pule kiba la ioh iaka Scholarship naka Chief Minister’s Scholarship Scheme jong u snem 2025-26, ia kane la pyntip u Myntri ka tnat pule puthi u Bah Lahkmen Rymbui hapoh ka Iingdorbar thaw ain.
Ha ka jubab jong ka jingkylli ba la wanrah daka MLA ka Gambegre constituency Dr Mehtab Chandee A Sangma bad u MLA ka Mendipathar constituency Marthon J Sangma, u Bah Lahkmen u la ong ba ka Sorkar Jylla ka la lah ban weng bad pynbeit ia ka jingeh jong ka jingpynslem ban pyllait iaka Scholarship (Umbrella Scheme of Post-Matric Scholarship) jong ki samla pule ba hap haka thup ST ha u snem bala dep.
Haba pynshai halor ki lad ki lynti ba la shim ban pynthikna ban pyllait ha ka por kaba biang iaka Scholarship, u Myntri u la ong ba wat hapdeng ka jingpynslem ban ïoh ïa ka pisa na ka Sorkar Pdeng na ka bynta u snem pule 2024-25, hynrei ka Sorkar Jylla ka la pynthikna ba ki samla pule kiba hap haka thup ST kiba dei hok ban ioh kim dei ban shah ktah.
“Ka Sorkar Jylla ka la pyllait lypa ai pisa T.236.0056 klur naka bhah Sorkar Jylla bad ka la pyllait ïa ka Scholarship sha ki samla pule kiba dei hok, katba dang ap ban ïoh ïa ka bhah jong ka Sorkar Pdeng” la ong u Bah Lahkmen.
Ia ka pisa ba la mang lypa naka Sorkar Jylla yn pynbeit hadien baka Jylla ka ioh pdiang ia ka bhah jong ka Sorkar Pdeng ynda la ioh ia ka pisa na ka Ministry of Tribal Affairs ka Sorkar Pdeng.
