Dibrugarh, Naitung 28: Uwei u samla 20 snem rta ula duh ei la ka jingim na ka jingtwa khyndew hapoh Margherita ha ki bynta shatei ka Tinsukia district ka Assam. Ia une u samla la tip kyrteng kum u Subham Das.
Ki tyllong khubor ki iathuh ba u Das u la khlad noh ha ka por ba u dang pynkit ia u dewiong beain. La ong ruh ba une u lanot u dei u ba iatreilang bad uwei u nongkhaii tuh dewiong ba la tip kyrteng kum u Prabin Tanti uba dei na Ledo Tea Estate.
U Subham Das la iathuh ruh ba u dei u khun ba marwei jong u Tapan Das u ba shu trei bylla.
Watla katta uwei na ki nongshong shnong u la kam ba hadien ka jingkhlad noh jong u Subham na ka jingtwa khyndew, ia ka met jong u ym shym la aiti sha ki pulit na ka bynta ban leh ia ka ba donkam bad na ka bynta ban leh ia ka postmortem namar ki runar khaii dewiong beain ki la byrthen ia ki ba haiing hasem ki jong u ba ki dei ban sngap jar halor kane ka jingjia.
Ka jingleit on thang ia ka metiap jong u Subham la pyndep hapoh ka jaka thang briew ha Tikak Colliery kham hadien khlem ka jingtip jong ki bor sorkar.
“Dang ha kine ki khyndiat bnai ba la dep ki ba bun tylli kum kine ki jingjia ki la wan jia bad ki ba bun na ki nongtrei bylla ki la khlad noh ha ka por ba ki dang leh ia ki kam tuh dewiong na ki jaka ba la lum thup ia u dewiong,” ong ka tyllong khubor.
“Kumba long u Subham, ki ba bun ki khynnah ki ba la pep skul noh shiteng por ki la leit pyniasoh ia lade bad kine ki kynhun khaii dewiong beain. Khnang ban kham ioh pisa shuh shuh kine ki samla ki ju tuh ia u dewiong na ki jaka ba la lum thup hapdeng ka jingsyier ia la ka jong ka jingim,” ong u nonghikai hapoh Margherita College.
