Kohima, Naitung 28 : Ka sorkar Nagaland kan pyntreikam da ki satellite technology na ka bynta ban jurip bniah ia ki projek ha ki thain ki ba pajih ki ba shem jynjar ban poi namar ki jaka riat ba khohruh khohram ka jylla, ong ka khubor heh sorkar hynnin ka sngi Balang.
Na ka liang u Principal Secretary & Development Commissioner u Amardeep Singh Bhatia ha ba aijingkren ha ka workshop ka ba shi sngi kynthih hapdeng ki ophisar jong ki tnat bapher bapher ki ba pyntrei ia ki projek, u la pynpaw halor ka jingpyndonkam ia ka space technology da ka ba ong ruh ba lada ia ka jingstad technology la pyndonkam bha da ki tnat bapher bapher, kane kan iarap ha ki ba bun ki liang bad ki jingmyntoi kin sha ki ba bun ki paidbah nongshong shnong.
Nalor kata u la ong ruh ba ia kane ka jingthmu ban pyntreikam la dep ban shim ia ka rai ka ba khatduh ha ryngkat ka jingiasyllok bad ka North Eastern Space Applications Centre (NESAC), ka ba hap hapoh jong ka jingkhmih jong ka Centre Department of Space ka ba don ha Meghalaya.
U Bhatia u la ong bad ka Geographic Information System cell ka don ia ki jinglum jingtip ne database na ka bynta ka jylla Nagaland ka ba donkam ban pyniaid shakhmat, bad na ka liang ka NESAC bad ka ISRO ki la don bynta na ka bynta ban nang pynbha shuh shuh ia kane.
Ia katei ka workshop la khot pynlong da ka Nagaland GIS and Remote Sensing Centre, bad ka State Government’s Planning and Coordination Department.
