Shillong, Naitung 28 : Ka jingiakhun ha ka kylla ba nyngkong jong ka Shillong Premier League ka pyni ba ka Mawlai ka ioh ban bat ia ka kyrdan ba nyngkong ha ka miej ia khein point katba ka Mawkhar pat ka wan ha ka kyrdan kaba khatduh.
Lah ban kdew hangne haduh kaba kut jong ka kylla ba nyngkong (first leg), ka Mawlai ka wan ha kyrdan ba nyngkong da ki 19 point na ki hynñiew tylli ki jingiakhun, bud sa ka Langsning ha ka kyrdan ba ar sa ki 14 point nangta ka Rangdajied United ha ka kyrdan kaba lai da ki 11 point
Ka Ryntih watla ka don lang da ki 11 point hynrei ka don ha ka kyrdan kaba saw namar ka jingiapher ha ka jingïoh thep kol. Hadien kane, wan ka Nangkiew Irat ha ka kyrdan ba san da ki 9 point, ka Shillong Lajong ha kyrdan ba 6 da ki 7 point, ka Malki pat ha kyrdan ba 7 da ki 4 point.
Katba ka Mawkhar kaba don ha ka kyrdan ba khatduh ka don mynta da ki ar point hadien ba ka mad ia san tylli ki jingshah rem bad ar tylli ki jingiakhaid.
Katei ka kynhun mynta ka hap ban iakhun tyngeh ha ka kylla kaba ar kaban sdang naduh u bnai ban wan.
Kitei ki phra tylli ki kynhun kin ioh shong thait shwa na ka bynta shi taiew ha shwa ba kin rung pat sha ka kylla kaba ar jong ka Premier League kaban sdang naduh ka 03tarik u Nailar, 2022.
Ha ka kylla ba ar kaban long ha ka 03tarik Nailar, ki kynhun kiban iakhun nyngkong kin long hapdeng ka Shillong Lajong pyrshah ia ka Rangdajied United FC ha ka por 4baje janmiet.
