Shillong, Naitung 28: Na ka liang ka sorkar pdeng shen kan pyllait ia ka jingiarap pisa na ka bynta ka jingpyniaid beit ia ki jingtreikam jong ki skul SSA ha kane ka jylla Meghalaya. Ia kane la pynpaw da u Symbud Myntri Rangbah ka jylla u Bah Prestone Tynsong hynne ka sngi Palei
“Dang shen ngi la iakynduh ia ki heh sorkar na ka tnat Ministry of Finance bad na ka liang u Myntri Rangbah (CM) ka jylla u Conrad Sangma da lade hi u la iakren bad ka Myntri Pla Tyngka ka sorkar pdeng ba kan tuklar lem ha ka ba iadei bad kane ka phang namar baroh ka shong eh ha kane tnat, bad halor kane la pyni ruh ia ka dak ka jingseisoh ha ka ba shen na ka liang ka sorkar pdeng kan sa pyllait ia ka pisa ka ba dei na ka bynta ka jylla Meghalaya,” ong u Symbud Myntri Rangbah.
Ha ka 21 tarik mynta u bnai, na ka liang ka sorkar jylla ka la pynthikna na ka bynta ka jingpyllait ia ka pisa ka ba long T.122 klur khnang ban lah ban siew ia ka pisa ka ba saw bnai kynthih ka ba dei ka tulop ka ba dang sahteng jong kumba 12,541 ngut ki nonghikai SSA, kata hadien ba ki la shim ia ka rai ban pynlong ia ka jingiakhih da ka ba thiah miet hapoh surok.
Ka jingpynthikna lyngba ka jingthoh ba la phah sha ka MSSASA ka la pynpaw ba na ka liang ka sorkar jylla kan pyllait noh mardor ia ka tulop ka ba dang sahteng ka ba long T. 44.0 klur.
Nalor kata ka la ong ruh ba na ka liang ka sorkar jylla kan pyndap pat ia ka Corpus Fund ka ba T. 78.0 klur ia ka ba yn sa pynphai pat hadien ba la ioh pdiang ia ka first installment na ka sorkar pdeng, bad na ka liang ka Tnat pule puthi kan phah mardor ia ka jingtyrwa.
Ia ka tulop ka ba dang sahteng na ka bynta shi bnai yn siew hadien ba la ioh pdiang ia ka pisa na ka sorkar India.
