Dibrugarh, Nailar 04:Laingut ki briew ki la duh ei la ka jingim na ka jingshah iuh ha ka kali ka ba pynher sted ha ka surok Jaipur Natun Ali road ha Dibrugarh hynnin ka step sngi Balang.
Ia kine ki laingut ki lanot la tip kyrteng kum u Vikram Mahali (42), Lakhi Patar (26) bad u Nirmal Das (35) ki ba dei na ka shnong Lahowal.
Ki tyllong khubor ki iathuh ba baroh kine ki laingut ki lanot ki ba dei ki nongtrei bylla ki dang ieng harud surok hadien ba kawei ka kali Maruti Suzuki Breeza ka ba don ia u no (AS 06Z 4617) ka ba la pynher sted bha ka la wan ban tynrah beit beit ia ki.
“U Nirmal Das u la khlad hashen ha kane ka jingjia katba ia ki arngut la pynkit noh mardor shapoh AMCH hadien ba ki la khlad noh hapdeng ka jingshah sumar. Kine ki laingut ki nongbylla ki dang ap ia ka bus harud ka surok ha Lahowal hadien ba kane ka jingjia ba sngewsih ka la wan jia,” ong ki sakhi.
Na ka liang ki paidbah ki ba don ha katei ka jaka ki la bat noh ia u nongniah jong katei ka kali bad thombor ruh ia u.Hadien kane ki la aiti noh ia u sha ki bor pulit.
“Une u nongniah jong kane ka kali u la don hapdeng ka jingbuaid bad u dang iaid lyngba na ka liang ka Dribrugarh ban leit sha Duliajan.U la pynher sted bha ia ka kali ka ba u niah ha ka ba um shym la lah shuh ban tehlakam bad leit tynrah beit beit ia kitei ki laingut ki briew ki ba dang ieng ap kali harud surok.Uwei napdeng kine ki nongbylla u la khlad hashen katba arngut kiwei pat ki la khlad noh hapoh ka hospital,” ong u heh pulit.
