Guwahati, Nailar 04: Laingut ki koidi ki ba dang don hapdeng ka jingshah tian bishar ki la lait phet napoh ka phatok jong ka district ka ba don ha Diphu, Karbi Anglong ka Assam hadien ka jingpulom ha ka liang ki bor pahara bad namar ka jingther jong u ‘lapbah ha kane ka miet sngi ba Ar ba la lah.
Kine ki laingut ki koidi ki dei ki ba la tip kyrteng kum u Abdul Ainul, Idris Ali, bad u Ajmir ki ba la shah set hapoh ka isolation ward hadien ba ki la test positive na ka jingpang Covid-19.
Napdeng kine ki laingut ki koidi, u Abdul u dei u ba la shah kem halor ka jingdonkti ha ka kam tuh, katba ki arngut kiwei pat ki dei ki ba la shah kem halor ki kam khaii drok.
“Kine ki laingut ki koidi la lap ba ki don ia ka jingpang Covid-19 ha kane ka sngi Nyngkong ba la lah hadien ba la pynkynriah noh ia ki sha la ka jong ka kamram ka ba kyrpang.Ka dei ka miet ka ba jur slap bha ha kane ka sngi ba Ar ba la lah bad ka bording kam shym la treikam ha katei ka por.Kine ki koidi ki la shim kabu bad phet krad noh da ka ba pynpait ia ka jingkhang jong ka kamram ka ba la set ia ki,” ong ka lad pathai khubor ka ba la shim ia ka jingkren jong u Superintendent ka phatok, u Tapan Kumar Chutia.
Watla katta, na ka liang une u Superintendent um shym la pynpaw ei ei halor ka jingpulom ha ka liang ki bor pahara.
Na ka liang ka IG ka ba khmih halor ki kam phatok, ka Barnali Sharma ka la ong ba kin pynlong ia ka jingtohkit ka ba bniah halor kane ka jingjia bad ba kumno kine ki koidi ki la ioh lad ban phet krad napoh ka phatok wat hadien ka jingpynbiang ia ki bor pahara. Nalor kata ka la ong ruh ba lada lap ia kino kino ki heh pulit ki ba donkti halor kane kin ngat ha ka jingshah pynshitom.
