Shillong, Nailar 4: U Myntri Rangbah ka jylla Conrad Kongkal Sangma hynne ka sngi palei ula ong ba ka Jylla ka donkam ban ithuh ia ka jingtbit treikam jong ki briew bad ban pyndonkam ia ki ha ki jaka ba ki lah ban treikam bha khnang ban lah ha ka ban ai ka jingshakri kaba janai tam.
U Myntri Rangbah ula kren ia kane ha ka jingialang plie ia ka Meghalaya Next Leaders Workshop kaba pynlong da ka Development Commissioner’s Office, ka Sorkar Jylla ha Convention Centre, Shillong.
Attended the Meghalaya Next Leaders Workshop- a Summer Program on Evaluation & Problem Driven Iterative Adaptation(PDIA) with administrative heads of the State, officials of @NITIAayog, @BMGFIndia, @Suffolk_U & one of the developers of PDIA, Dr. Michael Woolcock @PMOIndia pic.twitter.com/xP9y5Cpm5z
— Conrad Sangma (@SangmaConrad) August 4, 2022
Ia kane ka workshop la pynlong ha ryngkat ka jingiatreilang bad ka NITI Aayog’s Development Monitoring Office bad la kyrshan ia ka da ka Bill and Melinda Gates Foundation.
U Myntri Rangbah ula ong ba ka jingdon ia ka jingmut jingpyrkhat kaba beit ka long kaba donkam bha ban ioh kheit ia u soh ka jingjop.
“Lada phim don ia ka jingmut jingpyrkhat kaba beit bad ka ba khlain, watla phi lah treikam katno katno ruh kane hi kan ym lah ban wanrah jingkylla” ula ong.
Haba kren bniah halor ka jinglong kongsan ban iatrei kum ka kynhun, u Myntri Rangbah ula ong ba ki Tnad treikam kim dei ban trei la la ka jong ka kam hynrei ki dei ban iakynduh bad iatreilang khnang ba kin lah ban kynjoh ia ka thong kaba kham heh.
“Ngi donkam ban ithuh ia ki jinglah treikam jong ki para ba iatreilang na ka bynta ban lah pynmih ia ka kynhun kaba tbit treikam bad ban ailad ruh ia ki ba kin trei ia ki kam ki jam” ula bynrap.
Kane ka workshop halor ka phang “building a capable learning State” ka dei kaba la iashimbynta da u Dr. Michael Woolcock, uwei na ki nongpynwandur ia ka Problem Driven Adaptation (PDIA), Dr Aron Manoharan na Suffolk University, Massachusetts nalor kiwei kiwei.
