New Delhi, Nailar 04 :Ki bor pulit ka Assam ha ka sngi ba Ar ba la lah ki la ioh ban pyllait im ia ki arngut ki khynnah kynthei ki ba dei na Assam ki ba la jah rngai noh naduh kane ka taiew ba la lah.
Katkum ka khubor, ki ba haiing hasem jong kine ki arngut ki khynnah kynthei ki ba la jah rngai naduh ka 29 tarik u Naitung ba la dep na Assam ki la leit ban ujor sha ki bor pulit halor kane ka jingjia baroh.
Hadien kane ka jingujor, na ka liang ki bor pulit ka Delhi ha ryngkat ki pulit ka Assam ki la pynlong ka jingthwet ka ba jur bad lapdien ia kine ki arngut napoh ka steshon rel ha New Delhi.
Kine ki khynnah kynthei ki ba dei ki nongshong shnong jong ka sor rit Rowta ka ba hapoh Udalguri district ka Assam la suba ba ki dei ki lanot na ka jingshah khaii.
Katkum ki khubor la iathuh ba ia kine ki arngut ki khynnah shen yn sa pynpoi noh sha la ki jong ki iing ki sem hadien ba la pyndep ia ki jingdonkam baroh.
Ha kawei pat ka bynta, na ka liang ki bor pulit ki dang pynlong ka jingtohkit bniah halor kane ka bynta khnang ban ioh kem ia ki briew ki ba donkti ha ka ba pynpoi ia kine ki khynnah kynthei shapoh Delhi.
