Itanagar, Jylliew 29: Ka jingther u ‘lapbah ha kine ki khyndiat sngi ba la lah ka la wanrah ka jingtwa khyndew bad ka jingshlei um ha ki bynta jong ka nongbah ka Arunachal Pradesh bad ki bynta ba markhap jong ka Papum Pare district ka ba la shim ruh ia ka jingim jong ki laingut ki briew bad ka jingjah rngai jong ki arngut kiwei pat.
Kawei ka longkmie 36 snem rta, ia ka ba la tip kyrteng kum ka Sangio Yapa ka la khlad noh katba laingut kiwei pat ki la ngat ha ka jingmynsaw hadien ba ka iing ka jong ki kala shah tep ha na ka jingtwa khyndew hapoh Takar Colony ha Naharlagun ha ka sngi ba Ar ba la lah, ong u heh ka tnat District Disaster Management Officer (DDMO) u Moromi Sonam.
Kine ki laingut ki briew ki kynthup ia iwei i khunlung i ba dang ar snem ia ki ba la lah ban pyllait im da ki ba haiing hasem, ong shuh shuh utei u heh ka DDMO.
Na ka liang u heh ka DDMO ka Nima Tashi u la pyntip ba sawngut ki briew ki la ngam jyllop namar ka jingshlei um hapoh ka wah Hollongi River ka ba don ha ka shnong Huto hapoh ka district ha kane ka sngi ba Ar ba la lah katba san ngut kiwei pat ki la ngat ha ki jingmynsaw.
Watla ia ka metiap jong uwei la lah ban sei, hynrei ym pat shym la lapdien satia ia ki arngut kiwei pat. Shuh shuh ka kaiphot na katei ka tnat ka la ong ruh ba haduh kumba 10 ngut ki briew ki la shah tep im na ki jingtwa khyndew hapoh ka shnong kaba hap hapoh Balijan circle jong ka district ha ka ba uwei u la khlad noh bad khyndai ngut kiwei pat ki la lait thaw da ka said.
