Dei ki kynhun niah thuk thuk, ngat 4 ngut ha kti ka ain
Shillong, Jylliew 29: Ki runar kiba shoh ia ki samla pule na Kerela ha Jaiaw Pdeng, ki dei ki runar jong ka kynhun niah thuk thuk kiba la ktah kti ia kine ki samla hadien ka jingshoh ia u Pulit pyniaid kali bad ia u Nongrahtiar Swiggy.
Ki Pulit ka East Khasi Hills, kila kem ia 4 ngut na kane ka kynhun bad ka jingthwet mynta ia kiwei kiwei ka dang iaid shakhmat.
“Hadien ka jingpynithuh da ki lad bapher bapher, 4 ngut na kine ki runar kila shah kem haduh mynta. Hadien ka jingtohkit, la pynthikna ia ka jingdonkti jong ki ha kane ka kam bymman” ong u Superintendent of Police ka East Khasi Hills Bah Sylvester Nongtnger ha ka kyrwoh bala phah sha ki lad pathai khubor.
Une u Heh Pulit u pyntip ba ha ka 24 tarik Jylliew kane ka kynhun ki nongniah thuk thuk kila shoh shuwa ia uwei u Pulit Traffic hadien ka jingshah bat ha lad ban hiar sha Iing u Bah S.D Khongwir, Mawlai Iewrynghep namar ka jingbym deng ia ka jingtap khlieh (helmet).
U ong ba hadien kane, kane ka kynhun kala shoh sa ia uwei u nongrahtiar swiggy hajan Mahari Petrol Pump, Jaiaw Langsning hashuwa ba kin rung sha Jaiaw Pdeng.
“Ha Jaiaw pdeng, kila ieng hakhmat ka E.S Restaurant bad kla shoh ia kine ki samla pule na Kerela” ula ong haba pyntip ba artylli ki ejahar la mudui pyrshah ia kine ki runar ha Lumdiengjri Police Station bad ka Mawlai Police Station.
Ia kine ki saw ngut kiba shah kem la ialam tian bishar sha ka Iingkashari bad na ka liang ki Pulit, kila pan por 5 sngi ban ioh tohkit khambniah ia kine ki runar.
