Shillong, Iaiong 03 : U National President ka NPP bad Myntri Rangbah ka Jylla Conrad K Sangma ha ka sngi Ba-ar, ula ong ba kano kano ka Jylla lane ka Ri ba kin kiew shaphrang, ki nongshongshnong ki dei ban don ia ka mynsiem jong ka jingieid bad ka jingsngewlem ia kiwei.
“Ban ieid ialade, ka ktien ka thylliej bad ia ki briew lajong kam dei ban long pat ha kaban shun ia kiwei ki para briew bad jaidbynriew” ula ong na ka rynsan ialap elekshon ha Ladthadlaboh, Jowai, West Jaintia Hills.
Kane ka jingkren u Conrad ka iahap bha bad ka long kum ka jingpynphai nia ia kiwei pat ki seng sain pyrthei kiba pyrshang ban pyndonkam ia ka kyntien ieid jaidbynriew bad ialehkai politics da ki jingsngew jong ki briew haba phai sha ka jinglong riewlum.
“Hooid, ngi ieid iala ki briew hynrei kane kam mut pat ba ngi dei ban shun ia kiwei” ula ong haba kren shai ba ki seng sain pyrthei kiba iaid lait ia ki ishu kiba ktah shisha ia u paidbah bad ka roi ka par, kim don eiei baniakren lait noh tang ban ialehkai politics ia ka jingsngew u paidbah halor ka ktien ka thylliej bad ka jinglong riewlum.
Khlem da kiar ban jer kyrteng ia ka Voice of the People Party kaba ki nongialam ki mlien ban kren shit jaidbynriew, une u Nongialam ka NPP ula ong “Kila pyrshah iaka ktien Hindi. Kim sngewthuh ba don ki por, ngi donkam ban pyndonkam ia ka Hindi haba iakren lane pynbeit ia ki katto katne ki jingeh jong ki paidbah jong ngi. Lada ngi dei ban kren hindi, ngin kren namar ha ngi,ki paidbah ki wan hakhmat eh. Ngi ieid, burom bad sngap ia ki briew lajong”.
Ula kynthoh ruh ba kine ki seng sain pyrthei kila kren baheh sharum shaneng kum “Ngin ym ai wat tang shi inch ka jaka sha Assam” hynrei, kim sngewthuh pat ba kaei ka sienjam bala shim da ka Sorkar ban lah pynbeit ia ki jingeh kiba mih ha khappud ka Assam-Meghalaya.
“Ki kwah ban khring ia ka jingmut jingpyrkhat ki paidbah lyngba ki buit politics, shu ak bad leh drama” ula bynrap.
U Conrad ha kane ka rynsan, ula pan ia ka jingkyrshan u paidbah ban pynjop ia ka kyrtong ka NPP kong Ampareen Lyngdoh na Shillong Parliamentary constituency.
U Conrad ula leit ruh ban ialap elekshon ia ka NPP ha Sutnga bad Rymbai nalor u Symbud Myntri Rangbah ka Jylla Bah Sniawbhalang Dhar bad ka Myntri Sorkar kaba dei ruh ka kyrtong ka NPP Kong Ampareen Lyngdoh.
