New Delhi, Naiwieng 25 : U Myntri Rangbah ka Jylla Conrad K Sangma hynne ka sngi thohdieng, ula iakynduh ia u Chairperson ka National Human Right Commission u Justice Arun Kumar Mishra bad buh ia ka jingkyntu ia ka Commission ba kan tuklar lem ha kaban pynioh ia ka jingbishar kaba hok ia ki 5 ngut ki riew paidbah kiba shah siat iap ha ki Pulit ka Assam ha Shnong Mukroh, West Jaintia Hills.
Gave a detailed account of the firing incident that claimed 6 lives at Mukroh to Hon’ble Justice Arun Kumar Mishra Ji, Chairperson, National Human Rights Commission and other members of the NHRC with Hon’ble Deputy CM Prestone Tynsong@narendramodi @AmitShah @India_NHRC pic.twitter.com/rkbMRQJfvY
— Conrad Sangma (@SangmaConrad) November 25, 2022
Ia u Myntri Rangbah la synran da u Symbud Myntri Rangbah Bah Prestone Tynsong bad ha kane ka jingiakynduh, la iadon lang ruh ki dkhot jong ka NHRC.
U Myntri Rangbah ula ai ia ka jingbatai kaba bniah halor ka jingjia ha Mukroh bad pynpaw ba kane ka jingjia ka dei ka jing iuhroit ia ka hok longbriew manbriew.
U Conrad ula ai ruh ia ki jingbatai halor ki daw kiba lam sha kane ka jingjia bad ka jingther kuli jong ki Pulit ka Assam bad Forest Guard ba khlem daw, kaba lam sha ka jingiap ki 5 ngut ki nong Meghalaya bad u Forest Guard ka Assam.
Ula pyntip ruh ia u Chairperson halor ki sienjam bala shim ba kynthup ia ka jingdawa ban tohkit da ka CBI ne NIA ia kane ka jingjia.
U Myntri Rangbah ka Jylla ula pan ia ka jingkyrshan bad ka jingtuklar na ka liang jong ka NHRC.
Ha kane ka jingialang, u Myntri Rangbah ula ban jur ruh halor ka jingdonkam ban ai jinghikai ia ki bor pahara kiba don ha ki jaka ba iakajia pud khnang ban tehlakam ia kum kine ki jingjia kiba shim jyndat ia ki mynsiem briew.
Kiba iadonlang ha kane ka jingialang ki kynthup ia u Devendra Kumar Singh, Secretary General ka NHRC, Rajiv Jain, Member NHRC bad Bah Cyril V. D Diengdoh, Secretary, Home Police, ka Sorkar Meghalaya.
