Shillong, Naiwieng 25 : Ka jingpynpoi ia ka petrol/diesel bad ki marbam kala iaid biang kumba ju long sha ri-lum Khasi bad Jaintia hynne ka sngi thohdieng hadien ka jingtuklar jong ka Sorkar Jylla ban ai pahara ia ki kali kiba iaid sha ki 7 tylli ki District ka Jylla.
Kane kala mih hadien shisngi ba ka Assam Petroleum Mazdoor Union (AMPU) kala rai ban sangeh ia ka jingpynpoi ia ki kali kit umphniang (petrol/diesel) sha ri-lum Khasi Jaintia tad hadien ba ka Sorkar Jylla kala pynbiang ia ki bor pahara ia ki kali bad shim ruh ia ka jingkitkhlieh lada jia eiei ia ki nongniah ne nongbud jong kine ki kali kit umphniang.
Kane ka jingpynbna jong ka AMPU kala pynkhihwin ha ki 7 District ka ri-lum Khasi bad Jaintia ha kaba la sakhi ia ki paidbah kiba iabeh sha ki petrol pump ban thep umphniang ia ki kali khamtam ha Shillong, watla ka Sorkar Jylla kala pynbna ba kam don satia ka jingkyrduh petrol.
Ki kali kit umphniang petrol/diesel kila kyntait ban wan kiew sha ri-lum Khasi Jaintia hadien ka jingshah siat iap ki 5 ngut ki briew ha ki pulit Assam ha Mukroh, West Jaintia Hills, kaba lam sha ka jingiakhih ha Shillong bad ka jingshah thang ki kali ba don u nombor plate ka Assam.
Hynne ka step sngi thohdieng, ki kali kit umphniang ka BPCL kila mih na Assam bad kumjuh ruh ki kali ka IOC bad HPC kila wan ban kiew sha ri-lum Khasi bad Jaintia ban pyndap ia ka jingdonkam petrol/diesel jong ki petrol pump.
Kane ka jingwan pynpoi umphniang biang jong ki kali na Assam kala wan jia hadien ba ka Sorkar Meghalaya kala bthah ia ka Tnad Pylut ha baroh ki District ka ri-lum Khasi bad Jaintia ba kin ai pahara ia ki kali kit umphniang.
Ka shithi bala phah da u Pravin Bakshi, Director ka Food, Civil Supply & Consumer Affairs, ka Sorkar Jylla , kala bthah ia baroh ki Deputy Commissioner jong baroh 12 tylli ki District ka Jylla ban pynthikna ia ka jingsngain bad ai pahara ia ki kali kit petrol/diesel, kali kit marbam bad baroh ki kali kiba iaid lyngba ka Jylla na ki National Highway.
