Shillong, Naiwieng 25: Ka jingjia haka shnong Mukroh ha kaba 5 ngut ki rangbah Khasi kila duh iala ka jingim kala pynbitar bad pynsngewsih ia kiba bun bad na ka liang jong u MLA ka Mowkaiaw u Bah Nujorki Sungoh ula dawa iaka jingbishar kaba hok halor ka jingshah siat iap jongki 5 ngut haka 22 tarik mynta u bnai.
Haba pynrem halor katei ka jingjia, u Bah Sungoh ula ong, “Ka Mukroh kam dei kaba don hapdeng ka jingiakjia pud hynrei ka hap bha hapoh ka jylla Meghalaya. Ngi don iaka Sub Centre jong ka sorkar bad ka LP school bad ki paidbah ruh ki dei kiba thep vote ha Meghalaya la bun phew snem. Kumta ban ong ba ka don hapdeng ka jingiakajia pud kam long kaba iahap satia ne kaba shong nongrim ha kaba iadei bad ka Mukroh”.
U Bah Sungoh ula pynthikna ba un shimkhia bha ia katei ka jingjia bad ban pynthikna ba ym dei ban don jingmap ia kito kiba donkti haka kam pyniap briew.
Ula kdew ruh ia ka jingeh kaba mad da ki paidbah naduh ki nongrep kiba shah pyndik bad shah rah sha ki thanad.
“Ngi la ioh pdiang ia ki jingujor na ki nongshong shnong ba man ba ki leit ban kit iaki marrep, phlang ne ia ki diengthang, ki hap ban siew pisa sha ki Forest Guard bad sha ki pulit Assam” la ong u Bah Sungoh.
