Shillong, Nailur 2: Ka jylla Meghalaya hynne ka sngi Nyngkong, ka la pynlong ia ka jingialang jong ki Myntri kam jngohkai ki Jylla ka thain Shatei Lam Mihngi bad Mihngi/ Union Territories kaba dei ka sienjam kaba kongsan ban wanrah ia ka jingiatreilang ban kyntiew ia ka kam jngohkai ha ka thain bad ka Andaman bad Nicobar Islands.
Kane ka jingialang kaba la thmu ban iasam ia ki jingshemphang bad ki buit kumno ban kyntiew ia ka kam jngohkai pyrthei ka la wanrah lang ia ki nongshah khot sngewbha bad ki nongmihkhmat na ki jylla bapher bapher jong ka thain Mihngi bad kumjuh ruh na ka thain Shatei Lam Mihngi bad Andaman bad Nicobar Islands. La ioh ruh ia ka jingbatai jong ki jylla bapher bapher shaphang ka jingdon ki jaka jngohkai pyrthei ryngkat bad ki jingthmu ban pynjanai ha ka lawei.
U Gajendra Singh Shekhawat, Myntri kam jngohkai ka sorkar pdeng ha ka jingkren jong u ha ka jingialang u la ong, “Nga dei ban sngewnguh ia ka jingangnud jong ki jylla. Kawei pa kawei ka jylla ka la buh iala ka thong.” U la pynpaw shuh shuh ba ki jylla ki la buh ia ka thong na ka bynta jong ki bad u la iaroh ia ka mynsiem iakhun hapdeng ki jylla. Hadien ba u la iohsngew ia ki jingkren jong ki jylla, u la ong ba ka dei kawei na ki jingialang kaba biang tam kaba u la leit iashimbynta haduh mynta.
U Paul Lyngdoh, Myntri kam jngohkai ka Jylla haba kren ha ka jingialang u la pynpaw ba ka jylla Meghalaya ka dei kaba la kyrkhu da ki jaka ba itynnad kiba khring ia uwei pa uwei u nongwan jngohkai bad ka dei ka jaka jong ki krem kiba phylla kynthup ia ka krem Mawmluh kaba la ithuh da ka UNESCO, kaba khring ia ki nongrung krem na kylleng ki ri ka pyrthei.
“Katba kine ki jingphylla jong ka mariang ki batai ïa ka kam jngohkai pyrthei ha ka Jylla jong ngi, ka tynrai bashisha jong ka Jylla Meghalaya ka shong ha ka jingsbun bad jingpdiang sngewbha jong ki briew jong ngi. Ngi ngeit ba ka jingkiew kaba don jingmut ka wan na ka jingpynkupbor ïa ki nongshong shnong, dei na kata ka daw ba ka jingïadon bynta jong ki paidbah ka long ka matpdeng jong ki jingpyrshang jong ngi ha ka kam jngohkai pyrthei,” u la ong.
“Ka kam jngoh kai pyrthei ka dei ka kam kaba ar kaba ai kam ai jam ha ka jylla Meghalaya, bad ka jingthmu jong ngi ka long ban pynkylla dur ïa ka Jylla jong ngi sha ka jaka jngohkai kaba ka India ka kham jied bha, ong u Shri Paul Lyngdoh. Hynrei kane ka wanrah ruh shibun ki jingeh ïa ka jylla. Ki jaka jngohkai ba pawnam ha Meghalaya ki dei kiba ju wan jngohkai da kiba bun ki nongjngohkai pyrthei kaba buh ia ka jingkit kaba khia ïa ki spah mariang jong ka Jylla. Kane ka jingbiang tarajur ka nang kynton shuh shuh namar ka jingduna ki ladpyniasoh bad ka jingbym biang ki jingtei, kum ki jaka sah, ki jingdonkam ha kiba bun ki jaka jngohkai pyrthei. Ban weng ia kine ki jingeh, ka sorkar ka kwah ban kyntiew ia ka kam jngohkai pyrthei kaba neh bad kaba don ka jingkitkhlieh, ban ioh ia ka jingsam mar katjuh ia ki nongjngohkai pyrthei ha kylleng ka jylla bad ban kyntiew ia ki jaka jngohkai kiba thymmai. Kumta, ka jylla ka ïatreilang bad ki kynhun bapher bapher kynthup ïa ki trai shong, kiba leh business bad ki paralok ha ka kam jngohkai pyrthei, ban thaw ïa kawei ka lynti sha ka jingroi kaba neh bad kaba ioh bynta lang.
Ha kine ki snem ba la dep, ka Meghalaya ka la paw kum ka jaka kaba itynnad ha ka map leit jingleit jong ka ri India. Haduh u snem 2023, ka kam jngohkai pyrthei jong ka Meghalaya ka la ai kam ïa ki 50,084 ngut ki nongshong shnong katba ka jingkynshew tyngka ka la poi sha ka T.465 klur tyngka ha kine ki lai snem ba la dep. Shwa ban sdang ka khlam COVID-19, ka kam jngohkai pyrthei ka la mad ïa ka jingkiew kaba phylla kaba kot haduh7.34 percent shisnem, kaba la khmih lynti ba kan wanrah ïa ka jingkiew kaba jur ha kine ki san snem ban wan.
Ka kam jngohkai pyrthei ha Meghalaya ym tang ba ka prat lynti ia ka roi ka par jong ka jylla, hynrei ka pynmih ruh ia ka jingai kam ai jam kaba kot haduh 50000. Ka Meghalaya ka la pynleit jingmut ruh ha ka kam jngohkai pyrthei kaba neh ha kaba ki jingthmu ba kongsan kum ka Community-Led Tourism Infrastructure Development Scheme, ka jingpynroi ia ka kam jngohkai mariang, bad ka jingpynjanai ia ka rukom lum ia ki jaboh jabaiñ.
Ka Meghalaya Grassroots Music Project (MGMP) ka don ruh ka bynta kaba kongsan ha kaban kyntiew ïa ka kam jngohkai pyrthei ha ka jylla Meghalaya. Ka MGMP ka iaid palat ia ka jingput jingtem namar ka pynroi ia ka ioh ka kot kaba thymmai, kaba pynkupbor ia ki nongput nongtem bad ka jinglong tynrai jong ka kolshor kaba pyni ia ka pateng ba kyrpang jong ka Meghalaya ha ka rynsan kaba kham heh kaba khring ia ki nongjngohkai pyrthei bad ki nongkynshew tyngka.
Ha kane ka prokram la ïohi ïa ka jingïakren jong ki Myntri kam jngohkai pyrthei jong ki jylla ka thaiñ Shatei Lam Mihngi bad Mihngi bad u Shri Gajendra Singh Shekhawat.
Ki riew pawkhmat kiba la iadonlang ki kynthup ia u Suresh Gopi, Myntri Khynnah ka Ministry of Tourism, U Shri Suman Billa, IAS, Additional Secretary Ministry of Tourism, ka Mugdha Sinha, IAS, Director General ka Ministry of Tourism jngohkai pyrthei, Bah Cyril VD Diengdoh Director ka tnad Tourism bad kiwei kiwei.
